مش معنى ان الجو حر انه بس موسم ايس كريم و الشوكولاتة راحت عليها. لأ ممكن نخليها شيكولاتة  منعشة فى الصيف. احلى طريقة ممكن يتاكل بيها براونيز (بالنسبة لى، صيف او شتا مش بتفرق) آيس كريم ڤانيليا ساقع مع سخونية الشوكولاتة بيطلع احلى طعم. و سهلة اوى تتعمل فى البيت فى اى وقت انتو عايزينه.

المقادير

٥٠٠ جرام شوكولاتة مطبخ

١٠٠ جرام زبدة

١ كوباية دقيق

١ كوباية سكر

٢ بيضة

٢ ڤانيليا

ا كوباية قطع شوكولاتة صغيرة chocolate chips

اختيارى : مكسرات

علبة ايس كريم ڤانيليا

زينة اللى انتى عايزاها (شوكولاتة m&m’s / صوص / مكسرات)

الطريقة

– سيحى الشوكولاتة على النار (خلى بالك النار تبقى هادية أو حطى الحلة فوق واحدة تانية فيها مياه).

– شليها من على النار و بعدين زودى دقيق و سكر و قلبى المكونات.

– بعدين اضربى البيض مع الڤانيليا و زوديهم عليها و قلبي.

– زودى ال chocolate chips و قلبى.

– و لو هتحطى مكسرات حطيها هنا.

– بعدين حطيهم فى صنية مدهونة فى الفرن لمدة ٣٠ دقيقة.

– لما تطلع من الفرن سبيها تبرد الأول لمدة ١٠ دقايق قبل ما تقطعيها.

– قدميها دافية عليها ايس كريم ساقع و استمتعوا بأحلى طعم.

– ممكن تزودى عليها شوكولاتة m&m’s  و/ أو صوص شوكولاتة /كراميل  و/أو  مكسرات.