شوربة الخيار بالكريمة

!متتخضيش من الاسم اصبرى بس

ست الحبايب معوداكى ان الشوربة جزء لا يتجزأ من السفرة؟ بالذات فى رمضان؟ طب رمضان السنادى جاى فى الصيف و درجة الحرارة كسرت الخمسين, مش حرام عليكى تعمليلهم شوربة فى الجو ده؟ لسه عايزة تعملى شوربة؟ طب اعمليهالهم ساقعة طيب. الشوربة دى سهلة أوى و مش هتاخد منك وقت فى التحضير بس نصيحة أعمليها أول حاجة و سبيها فى التلاجة على ما تطبخى الباقى

المقادير

– معلقة كبيرة زيت زتون 

– 2 فص ثوم مفرومين/متقطع صغير أوى (بدل ما توسخى ايدك و كدة اعمليه فى جارليك برو)

– 1 بصلة صغيرة متقطعة مكعبات

– معلقة كبيرة عصير لمون

– 4 كوبيات خيار متقشر و متقطع شرايح رفيعة

– 1 و ½ كوباية مرقة (أى نوع بس أنا بستعمل فراخ بلدي طعم أحلى)

– ½ معلقة ملح

– ¼ معلقة فلفل مطحون (الابيض احسن عشان ميبنش بس لو مفيش غير اسود مش هيقول لأ)

– رشة شطة (فلفل أحمر مطحون)

– 1 أفوكادو متقطع مكعبات

– ¼ كوباية بقدونس متقطع (سيبى حبة تزيينى بيهم فى الاخر)

– 1 علبة زبادى (170 جرام)

 الطريقة

– حطى البصل على النار مع زيت الزتون (اوعى تسيبيه يقدح مش حلو كدة) و بعدها بدقيقتين كدة حطى الثوم معاهم و افضلى قلبى لحد ما يطرو و بعدين حطى اللمون و كملى تقليب دقيقة كمان

– زودى الخيار و المرقة و الملح و الفلفل و الشطة و قلبى و سبيه يغلى لحد ما الخيار يطرى

– اطفى النار و سبيه يهدى بعدين اضربيه فى الخلاط

– و هو لسه فى الخلاط زودو عليه الأفوكادو و البقدونس و اضربى

– بعدين رجعيه فى الحلة و قلبى فيه الزبادى

– حطى الحلة فى التلاجة و قدميها وقت الفطار و زينيه بالبقدونس

الأدوات المستخدمة

Leave a Reply

Your email address will not be published. Required fields are marked *