دليل ياقوطة الشامل لاختيار العجانة الكهربائية

كتبت: منى عوض

لو إنت من محبي تحضير المعجنات المختلفة في البيت، يبقى العجانة هتكون شيء مهم بالنسبالك لأنها هتسهل عليك جدًا عملية العجن وهتخليها تخلص بشكل مثالي وفي أسرع وقت ممكن وبأقل مجهود ممكن على عكس لو قررت إنك تعجن بإيدك.

ومع ذلك، فيه ناس كتير جدًا بتحتار أثناء اختيار العجانة بسبب تعدد أنواعها وأشكالها وأحجامها وألوانها ومش بتبقى عارفة تختار إيه، عشان كده ياقوطة قررت تقدملكم النهارده مقال مخصوص هيُعتبر بمثابة دليل شامل لاختيار العجانة ده لأننا هنوضح فيه أنواع العجانات المختلفة وأهم مواصفاتها وكمان هنقولك شوية نصائح تاخد بالك منها قبل ما تشتري العجانة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

أنواع العجانات

العجانة اليدوية

العجانة اليدوية فيه منها نوعين واحد بتقدر تشغله بأيدك ومش بيحتاج كهرباء أما النوع التاني فهو العجان اليدوي الكهربائي وده بيشبه جدًا مضرب البيض لأنك هتمسكه في إيدك وتضغط على زرار التشغيل وتبدأ في عملية العجن، ولكن خذ بالك إنها بتحتاج مجهود كبير جدًا أثناء الاستخدام رغم سهولة تنظيفها وانخفاض ثمنها.

العجانة القائمة

العجانة القائمة دي عادة بتُعرف بأنها عجانة ذات قاعدة ثابتة بتسهل من عملية العجن لأن كل اللي هيتطلبه منك الأمر إنك تحط المكونات المطلوب عجنها في الوعاء وتشغل العجان وتسيبه يخلص، ولكن يعيبها ارتفاع ثمنها وصعوبة تنظيفها إلى حد ما وكمان شغلها مساحة كبيرة إلى حد ما في المطبخ.

أهم مواصفات العجانة

المواصفات اللي ياقوطة هتوضحها لحضراتكم دلوقتي هتساعدكم بشكل كبير جدًا أثناء اختيار العجانة الأنسب لاحتياجاتكم.

سعة العجانة

من المهم جدًا توخي الحذر عند اختيار سعة وعاء العجانة لأنه لو كان أصغر من احتياجاتك هتتعب وهتعجن على مراحل وبالتالي هتستهلك وقت ومجهود أكبر ولو جبته أكبر هتحس أن الجهاز شاغل مكان كبير جدًا في المطبخ وبالتالي ممكن تزهق أو تقرر تتخلص منه وتشتري واحد تاني.

حجم العجانة

حجم العجانة شيء مهم جدًا التدقيق فيه لأنه بيتوقف على سعة الوعاء وعلى المساحة التخزينية اللي إنت مخصصها للعجانة، ده بجانب إن فيه بعض أنواع العجانات بتكون ملحقة بأجهزة تانية معاها زي خلاط أو كبة وما إلى ذلك والنوع ده من الأجهزة بيُعرف باسم كيتشن ماشين.

نوع وعاء العجن

وإنت بتشتري العجانة وبتركز في سعة وعاء العجن لازم تاخد بالك كمان من مادة صنع الوعاء ده يعني يفضل دايمًا إنك تلجأ لشراء العجانة ذات الوعاء المصنوع من الاستانلس ستيل المقاوم للصدأ لأنه بيكون عملي أكتر وأمن وأكثر تحمل، على عكس الأوعية الزجاجية اللي بتكون أنيقة ولكنها قابلة للكسر بسهولة ووزنها تقيل جدًا.

سرعة العجانة

حاول بقدر الإمكان أنك تلجأ لأنواع العجانات اللي بتحتوي على سرعات مختلفة لأنها هتكون عملية بشكل أكبر وهتساعدك في إتمام صناعة المعجنات المختلفة اللي بتحتاج سرعات مختلفة بناء على لزجتها وسمكها في أسرع وقت وبأقل مجهود ممكن.

قوة العجانة

لازم تعرف إنه كلما زادت القوة الكهربائية للعجانة، كلما زادت قوة العجانة وفعاليته في العمل وقدرته على تحمل المهام المختلفة زي عجن العيش والبيتزا والكيك وخفق البيض وما إلى ذلك، مع العلم إن القوة الكهربائية للعجانة عادة بتبدأ من 400 وات وبتوصل لحد 1500 وات.

صوت العجانة

بعض أنواع العجانات بتصدر أصوات مزعجة أثناء التشغيل عشان كده لو إنت كنت من الناس اللي بتضايق من الأصوات العالية لازم تاخد بالك من صوت العجانة اللي إنت مقبل على شرائها.

ملحقات العجانة

وإنت بتختار العجانة الأنسب لازم تاخد بالك كمان من الملحقات المختلفة اللي بتيجي معاه واللي هتسمحلك في استخدام العجانة في أكثر من مهمة زي عجن مختلف أنواع العجائن وخفق البيض وما إلى ذلك، مع العلم إن كل مهمة أو وظيفة من دول ليها رأس أو ذراع خاصة بيها بتقوم بتغييرها زي ما أنت عايز في العجانة.

أيهما أفضل العجانة الكهربائية أم الكيتشن ماشين؟

فيه اعتقاد سائد إن الكيتشن ماشين أفضل جهاز من الممكن اقتنائه لأنه بيضم العديد من الأجهزة في جهاز واحد زي العجانة والمفرمة والخلاط والكبة والعصارة وما إلى ذلك، وبالتالي شغل مساحة تخزينية أقل من فكرة شراء كل جهاز لوحده.

ولكن الحقيقة إن كل اختيار من الاتنين ليه مميزات وليه عيوب، يعني مثلاً الكيتشن ماشين حلو جدًا في توفير المساحة وشكله أنيق واستخدامه سهل، ولكن الأجهزة كلها بتكون معتمدة على موتور واحد فلو الماتور ده عطل الجهاز كله عطل، وكمان من الصعب استخدام أكتر من جهاز في نفس الوقت ولا ورا بعض بأوقات قصيرة عشان برضة فكرة الموتور الواحد اللي هيكون محتاج يرتاح بين استخدام كل جهاز والتاني.

أما بقى بخصوص فكرة شراء كل جهاز لوحده فهي ليها مزايا وليها عيوب، يعني مثلاً هتقدر تستخدم أي جهاز إنت عايزة في أي وقت وتقدر كمان تستخدم أكتر من جهاز في نفس الوقت ولو أي جهاز فيهم عطل هيكون الباقيين شغالين عادي جدًا، ولكن يعيبهم ارتفاع أثمانها وشغلها لمساحة تخزينية كبيرة جدًا في المطبخ وممكن كمان تسبب فوضى لو مش بتنظف وتلم أول بأول.

.شوف أكتر العجانات شهرة على ياقوطة من هنا

.وعشان تعرف أكتر ممكن تقرأ مقال بعنوان إيه الأفضل: الكيتشن ماشين ولا شراء كل جهاز لوحده؟

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.

Leave a Reply

Your email address will not be published. Required fields are marked *