بيوتنا هي أكتر مكان بنحس فيه بالأمان، وعادةً مش هنلاقي مكان أأمن على مقتنياتنا الغالية وأوراقنا المهمة أكتر من البيت، خصوصًا لو بنتكلم عن الحاجات اللي صعب تتعوض زي المجوهرات والفلوس، شهادات الميلاد، جواز السفر أو أي حاجة ممكن نحتاجها في أي وقت. وعلى الرغم من اهتمامنا بتأمين البيت إلا إن وجود خزنة حديدية في البيت بيدّي إحساس بالأمان أكتر من المعتاد.

وده لإن الخزنة عادةً بتكون مؤمَّنة ضد الكسر أو السرقة أو الحرائق، فأي حاجة مهمة عندنا في البيت (فلوس، مجوهرات، أوراق شغل مهمة) هتكون في أمان تام. ومش لازم تجيب خزنة علشان السرقة، الخزنة مهمة جدًا في حالة الاحتفاظ بأوراق الشغل أو لو كنت بتسافر كتير ومحتاج تحافظ على أوراقك من الضياع، أو لو عندك أطفال صغيرين وبتحب تكون محتفظ بحاجتك المهمة في أمان بعيد عن إيديهم.

ولإن فيه موديلات وأنواع كتيرة من الخِزَن في السوق، حبينا النهارده في ياقوطة نساعدك لو حبيت تشتري خزنة ونقولك تاخد بالك من إيه ونعرّفك كمان المقاسات الخاصة بكل خزنة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

محتاجين في البداية نعرف إيه هي مكونات الخزنة؟

صندوق وباب، في الأغلب بيكون من الفولاذ وطبقات متعددة من الحديد المدعم بالفولاذ وبيكون غير قابل للاختراق، الاحتراق أو الصدأ. في الباب بيكون موجود مكان لإدخال المفتاح، مقبض وقفل (يدوي أو ديجيتال) وفيه أنواع خزن مفيهاش مكان للمفتاح وموجود مكانه بصمة الصُباع، ويفضل نشتري خزنة من مكان موثوق وبيقدم خدمة ما بعد البيع.

طيب على أي أساس هتختار الخزنة؟

معظم الخِزَن المنزلية بتكون مُصممة  للحماية من الحرائق أو السرقة، و بعضها بيكون ضد الميّه. بس يا تري إيه المميزات اللي على أساسها نقدر نحدد أفضل خزنة ممكن نشتريها؟

ضد الحرائق

الحرائق هي الخطر الأول بالنسبة لأي حد هيشتري خزنة. الرابطة الوطنية للحماية من الحرائق بتأكد إنه خلال معدل العمر الافتراضي لأي بيت، فإن نسبة تعرُض البيت لحريق يتطلب استدعاء المطافي بتكون ٢٥٪، عشان كده ميزة إن الخزنة تكون ضد الحرائق مهمة جدًا. والخزائن عادةً بتكون مُصممة على أساس إنها تتحمل النار بدرجات متفاوتة (من ١٢٥ إلى ٣٥٠ درجة مئوية).

ضد السرقة

مع إن إمكانية سرقة أي خزنة منزلية بيكون صعب شوية، وده عشان اللصوص بيميلوا لسرقة الحاجات السهل حملها، بس برضه لازم نراعي عنصر الأمان المضاعف في الخزنة. عشان كده في خِزن بتكون مُزودة بترابيس إضافية وده عشان تكون عائق أكبر للصوص اللي غالبًا بيكونوا مستعجلين.

ضد المياه

تُعتبر ميزة إضافية في الخزنة، وده عشان احتمالية غرق خزنة منزلية بالمياه أمر وارد إنه يحصل.

التكلفة

كل ما بيزيد حجم ومميزات الخزنة، كل ما كان سعرها أعلى.

حجم الخزنة

بيتوقف حجم الخزنة على حجم الحاجات اللي هنشيلها فيها؛ بس عمومًا الأفضل نبعد عن الخِزن اللي حجمها صغير، وده عشان بتكون أسهل في حالات السرقة عشان شيلها بيكون سهل. بس إذا كنت مضطر تشتري خزنة صغيرة، يبقى من الأفضل تثبتها في أي حيطة أو في الأرض. حاجة كمان، عشان تقدر تحدد الحجم المناسب اللي انت محتاجه، جمّع كل الحاجات اللي ناوي تشيلها في الخزنة وحدد المساحة اللي هتحتاجها.

مكان حفظ الخزنة

بيعتمد مكان حفظ الخزنة على شكل وتصميم بيتك، بس فيه أماكن الأفضل نبعد عنها واحنا بنقرر المكان اللي هنحط فيه الخزنة، زي أوضة النوم الرئيسية مثلًا، وده لإنها بتكون أول أهداف اللصوص في حالات السرقة. ممكن يكون البدروم من أفضل الأماكن اللي ممكن نحط فيه الخزنة، وده عشان بيكون عادةً مكان معزول شوية وبعيد عن أي حاجة ممكن تحصل، زي الحرائق مثلاً.

سهولة حملها

الخزنة بتكون يا إما محمولة، متثبتة في حيطة أو متثبتة في الأرض. يا ريت نبعد عن الخزنة المحمولة عشان زي ما قولنا بتكون سهلة الحمل والسرقة.

نظام الغلق

في نوعين من الأقفال في الخزنة، القفل اليدوي وده بيبقى محتاج صيانة من وقت للتاني، والقفل الإلكتروني وده بيكون أفضل عشان مش بيحتاج صيانة. بس لو عايز نظام حماية أعلى، فيه خزن بيبقى نظام الأقفال فيها يدوي وإلكتروني مع بعض.

أنواع الخزن

على الرغم من اختلاف أنواع الخزن إلا إن كلهم بيشتركوا في خصائص واحدة زي إنهم مصنوعين من الفولاذ غير المقاوم للصدأ، وإنهم ضد الحرائق والكسر، وباقي الاختلافات بتكون عادةً في الحجم أو تفاصيل صغيرة زي وجود مكان للمسامير بالخزنة في حالة إنها هتكون في قلب الحيطة.

وعمومًا دي أشهر أنواع الخزائن المتاحة في السوق وممكن تشوف كل نوع وتحدد الموديل اللي هتحتاجه بالظبط.

• خزنة ذات مقبض ومفتاح: ودي التقليدية اللي كلنا عارفينها، بتحط المفتاح وتشد المقبض لاتجاه معين يتحرك اللسان والتروس من مكانهم وتفتح. بدائية شوية لكنها بتأدي الغرض منها في البيوت.

• خزنة ذات مقبض وقفل برموز ومفتاح: ودي عبارة عن قفل بأرقام بتقوم بتحريكه بزوايا معينة لإيصال الأرقام بالسهم المحفور على الخزنة علشان تطابق الأرقام برقمك السري اللي بيفتحلك الخزنة، وبعدين بتقوم بسحب المقبض لفتح الخزنة. والنوع ده ملائم للبيوت والمحلات التجارية.

• خزنة ذات مقبض وقفل ديجيتال: ودي اخترعوها للمستخدم اللي بيلاقي صعوبة في التعامل مع الخزنة اللي بتفتح برموز أو للناس اللي بتشيل الخزنة في مكان ضلمة أو إضاءته ضعيفة. والميزة فيها إنك لما بتدخل الأرقام الشاشة الديجيتال بتنور وتشوف انت بتكتب إيه (وفيه موديلات من الخزن دي بييجي معاها مفتاح احتياطي علشان لو نسيت الأرقام السرية). ودي مناسبة للبيوت والفنادق والمحلات التجارية والشركات كمان.

• خزنة تعمل ببصمة الإصبع: ودي نظام حمايتها أقوى لإنها بتعتمد على استحالة تشابه بصمات الإنسان، مشكلتها الوحيدة إن البصمة حساسة جدًا ولازم تراعي نضافة الإيد من أي أتربة أو شحوم وزيوت. وبتُستخدم في البيوت على الأغلب أو الشركات.
• خزائن دفن: وتعتبر البنوك هي أكتر مستفيد منها لأن حجمها بيكون كبير (عادة بيكون أكبر من ٢٠٠ ألف سم مكعب)، وبتشيل كميات ضخمة من الفلوس ومقتنيات البنوك والعملاء وبتتميز بأكتر من نظام حماية وباستحالة عملية اختراقها.

وطبعًا كل ما وزن الخزنة زاد كل ما كان أفضل لإن تُقلها هيمنع من احتمالية إن الخزنة تتشال من مكانها وكمان هيقلل فرص إنها تتكسر لإن كمية الفولاذ اللي جوّاها هتكون أكتر.

أحجام الخزن

فيه أحجام مختلفة من الخزن اللي بتناسب المستخدمين باختلاف وظايفهم وباختلاف أحجام الحاجات اللي هتتشال فيها، فمثلًا مش هينفع أجيب خزنة كبيرة لو أنا هحتاج أشيل فيها أوراق ومجوهرات بس، والعكس صحيح.

• ٢٥ سم مكعب: ودي مناسبة لو ما عندكش حاجات كتيرة في البيت عاوز تشيلها في أمان، زي المجوهرات أو الفلوس (ممكن تكون في الحيطة ولازم نراعي وجود مكان ليها واحنا بنأسس الشقة).
• ٣٠ سم مكعب: ودي مناسبة لو عندك أوراق مهمة وتحب تحتفظ بيها في مكان آمن (ممكن تكون في الحيطة ولازم نراعي برضه وجود مكان ليها واحنا بنأسس الشقة).
• ٤٠ سم مكعب: ودي مناسبة للمحلات التجارية.
• ٥٠ سم مكعب: ودي مناسبة للشركات الصغيرة، لحفظ الأموال والمستندات الهامة وأختام الشركات.
• ٧٥ سم مكعب: ودي مناسبة للشركات الكبيرة وبيتم تقسيمها داخليًا لأقسام (قسم لحفظ الأوراق، قسم لحفظ الأموال، قسم لحفظ الأختام، قسم لحفظ العقود وأي حاجة تاني مهمة في الشركة).
• خزن البنوك: ودي أكيد مش هنشتريها لكن حبينا نعرّفك إن مقاسها عادةً بيكون أكبر من ٢٠٠ ألف سم مكعب.

أنواع ومواصفات بعض الخزن

في الجدول ده هنعرض نماذج لمميزات وعيوب موديلات مختلفة للخزن.