تتبع الوقت بأناقة: إزاي تختار ساعة يد مُناسبة؟

إزاي تختار ساعة يد مُناسبة؟

كتبت: شذا وليد

تقريباً كل حاجة بنعملها بشكل يومي في حياتنا فيها عامل الوقت، إمتى بنصحى، إمتى بناكل، إمتى بنشتغل، إمتى بنتمرن، وإمتى بننام. مرور الوقت بيحدد عمرنا ومدى نضجنا وخبراتنا، وعلى نطاق أوسع، بيحدد حياتنا ككل.

عشان الوقت عامل مهم جدًا، كان لازم الإنسان يلاقي طريقة عشان يتتبعه ويعرفه. وإيه أحسن وأشيك من ساعة يد أنيقة عشان تعرف الوقت بسهولة؟ بس شراء ساعة يد جديدة مش أسهل حاجة. عشان كده ياقوطة جايبالك النهارده دليل مفصّل لشراء ساعة اليد المناسبة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

تعرّف على آليات الساعة

watch

آلية أو حركة الساعة هي اللي بتخلّي الساعة تقوم بأهم دور ليها، تتبع الوقت. العمليات الداخلية اللي بتبقى في الساعة هي اللي بتخلّي عقارب الساعة تتحرك وتحدد الوقت. في نوعين من آليات ساعة اليد، أول نوع هو الميكانيكي ودي أقدم أنواع الآليات (ترجع للقرن السابع عشر)، بتشتغل عن طريق مجموعة من التروس والنوابض اللي بتقوم بنقل الطاقة إلى الساعة عشان تتشتغل. الساعات من النوع ده عادةً بتبقى غالية عشان الحرفية والدقة اللي بتدخل في صناعتها. العيب في الساعات الميكانيكية إنها لازم تتظبط يدويًا كل فترة عشان التروس تشتغل بسلاسة.

شوف تشكيلة ساعات ميكانيكية، بسعر يبدأ من 899 جنيه مصري.

quartz watch

تاني نوع من آليات ساعة اليد هو الكوارتز وده الأكثر شيوعًا والأقل سعرًا. بيحددوا الوقت بدقة ومش محتاجين تظبيط. ساعات الكوارتز بتشتغل بالبطاريات، فبيحتاجوا يتغيّروا كل 12 إلى 36 شهر.

شوف تشكيلة ساعات كوارتز، بسعر يبدأ من 85 جنيه مصري.

الاختيار ما بين النوعين هيعتمد على احتياجاتك وميزانيتك. لو عايز ساعة عملية ومناسبة، يبقى اختار الكوارتز. لو انت شخص بتهتم بالتفاصيل وعايز تمتلك ساعة مميزة «ومعاك فلوس ليها»، يبقى هات الميكانيكية.

طب إزاي تفرّق بين الميكانيكية والكوارتز؟ خلّي بالك من حركة العقرب الصغير (اللي بيحدد الثواني)، لو العقرب الصغير بيتحرك بحركة واسعة ذهابًا وإيابًا، يبقى دي ساعة ميكانيكية. لو بيعمل صوت “تيك توك” وبيتحرك حول قرص الساعة بشكل دائري، يبقى دي ساعة كوارتز.

تفتكر الساعة وظيفتها بس تحديد الوقت؟

swatch

الإجابة المنطقية للسؤال ده هتكون نعم. لكن ساعات اليد دلوقتي بتتطور بشكل سريع عشان توفر لنا أداة بتعمل أكتر من إنها تقولنا الوقت.

  • التاريخ: دي واحدة من الوظائف الأساسية الموجودة في الساعات دلوقتي. فيه ساعات بتعرض اليوم بس، وفيه ساعات تانية بتعرض الشهر والسنة كمان. بس لازم التاريخ يتظبط في آخر كل شهر عشان يفضل دقيق.

شوف تشكيلة ساعات رجالية مع وظيفة عرض التاريخ، بسعر يبدأ من 225 جنيه مصري. وساعات نسائية مع وظيفة عرض التاريخ، بسعر يبدأ من 145 جنيه مصري.

  • كرونوغراف: اللي هي خاصية الستوب واتش، واللي بتخلّي المستخدم يقيس الوقت بدقة متناهية. بتوفر درجة أعلى من الدقة في تتبع الوقت.

شوف تشكيلة ساعات للجنسين بوظيفة الكرونوغراف، بسعر يبدأ من 95 جنيه مصري.

  • مراحل القمر: دي بتقيس مراحل تطور القمر وبتبيّن القمر شكله إيه في الوقت ده عن طريق إضاءة الجزء المنوّر من القمر على الساعة. بتبقى لمسة جمالية ومتطورة على ساعة اليد.
  • مناطق زمنية: الوظيفة دي مناسبة جدًا لأصحاب الأعمال والناس اللي بتسافر كتير، عشان بتساعدهم يظبطوا الوقت بسرعة في البلدان المختلفة بدون متاعب. فيه ساعات بيبقى فيها 3-2 مناطق زمنية، وفيه ساعات متطورة بيبقى فيها حتى 24 منطقة زمنية.

شوف الساعة الرجالي دي اللي فيها 3 مناطق زمنية، بسعر يبدأ من 295 جنيه مصري.

شراء ساعة يد فيها بعض أو كل أو ولا واحدة من الوظائف اللي اتكلمنا عليهم فوق دول قرار يرجع ليك. كله بيرجع لاحتياجك وطريقة استخدامك للساعة. وافتكر إن كل ما ساعة اليد بيكون فيها وظائف أكثر، كل ما هتبقى غالية.

حزام الساعة بيبقى معمول من إيه؟

حزام/أوستيك الساعة هو الجزء اللي بتلبسه حول المعصم. حزام الساعة بيبقى مصنوع من الاستانلس ستيل أو التيتانيوم أو السيراميك أو الذهب أو المطاط أو الجلد.

الاستانلس ستيل هو الأكثر شيوعًا والأقل سعرًا. بيبقى خفيف ومضاد للتآكل. التيتانيوم أخف بكتير من الستانلس ستيل، عمره بيبقى طويل ومش بيسبب حساسية للجلد. السيراميك أثقل من الستانلس ستيل والتيتانيوم، لكن مريح في اللبس وضد الخدش. بس خلّي بالك عشان ممكن يتكسر لو خَبَط في رخام أو أسفلت. الذهب أكيد أكتر مادة فاخرة وغالية فيهم وبينفع أكتر في المناسبات الرسمية والليلية بس مش مقاوم للخدش قوي. المطاط خفيف وسعره معقول. الجلد كلاسيكي وشيك لحزام الساعة وبيبقى مريح في اللبس، بس هتحتاج تغيّر الحزام كل فترة عشان عمره مش طويل زي الحاجات التانية.

يبقى تختار أنهي مادة؟ ده أولاً هيعتمد على ميزانيتك، تاني حاجة لازم تشوف هي مريحة في اللبس ولا لأ. أحياناً المواد المعدنية بتسبب حساسية لبعض الناس. تالت حاجة، الجلد والمعدن بينفع للرجال والنساء، بس أغلب الرجال بيفضلوا المعدن لأن ملابسهم عادةَ مش بيبقي فيها إكسسوارات بتلمع أو ملفتة للنظر زي اللي الستات بيلبسوها، بس الستات لازم هيبذلوا مجهود أكبر عشان يطقموا الساعة مع اللبس بحيث ما تبقاش مبهرجة بزيادة.

جينا للجزء الأهم: قرص وإطار الساعة

قرص الساعة هو الجزء اللي فيه الأرقام والعقارب اللي بتعرفك الوقت. إطار الساعة هو اللي بيثبت القرص في مكانه وبيبقى ليه أشكال وأحجام متعددة. فيه ناس بتحب حجم إطار الساعة يبقى كبير لحد 50 ميلليمتر، وناس بتفضل أحجام أصغر. إطار الساعة ممكن يبقى مستدير، مستطيل، بيضاوي، مربع، أو حتى شكل غير متساوي. اختيار شكل إطار الساعة شخصي وبيعتمد على ذوق كل واحد. بالنسبة للأرقام على قرص الساعة، ممكن تكون أرقام عربية، أو رومانية أو الأرقام على شكل شُرَط. فيه أحياناً ساعات بتجمع ما بين شكلين للأرقام. برضه ده بيعتمد على ذوقك وأنهي شكل الأسهل بالنسبة لك في قراءة الوقت. بالنسبة للون القرص، يُفضل يكون بلون فاتح للنهار ولون غامق بالليل.

زجاج/كريستال الساعة جزء مهم منها لأنه بيحدد عمر الساعة وهتعيش معاك قد إيه. الياقوت الصناعي هو الأغلى والأطول عمرًا وكمان مضاد للخدش. ييجي بعده الزجاج المعدني اللي سعره معقول أكتر لكن مش مقاوم للخدش بنفس درجة الياقوت. آخر نوع هو الزجاج الأكريليك وهو الأقل سعرًا لكن أكتر نوع معرض للخدش.

إزاي أختار ساعة يد مناسبة لحجم معصمي؟

مهم جدًا إنك تبقى مرتاح في الساعة اللي انت لابسها. ما ينفعش تكون ضيقة فتسيب علامات على إيدك لما تقلعها. وما ينفعش برضه تكون واسعة لدرجة إنها تلف على إيدك لما تحركها. لازم تكون قادر تحُط صُباع واحد تحت حزام الساعة وبكده تعرف إن مقاسها مظبوط. كل ما كان حجم معصمك كبير، كل ما الساعة لازم تكون أكبر والعكس صحيح عشان يبقى الشكل متناسق. خلّي بالك من سُمك قرص الساعة برضه عشان ده هيفرق في راحتك وانت لابسها.

إزاي أشتري ساعة يد أونلاين؟

شراء ساعة يد أونلاين مش بيبقى على طول سهل. بش ما تقلقش، ياقوطة هتديلك شوية نصائح مهمة عشان تعرف تشتري ساعة أونلاين.

  • لو العرض/السعر شكله مغري بدرجة مش معقولة يبقى في الأغلب حاجة أي كلام. خلّي بالك من المواقع المشبوهة والعروض المزيفة.
  • شراء ساعات اليد أونلاين بيخلّي عندك اختيارات أكتر، بالذات لو الماركة اللي انت عايزها ملهاش فروع أو محلات بيع في بلدك.
  • حاول تقرأ تعليقات الناس وآرائهم عن الماركة بشكل عام والساعة بشكل خاص عشان يبقى عندك فكرة كويسة.
  • اعرف مقاس معصمك عن طريق قياسه بشريط قياس وزوّد عليه 2-1 سنتيمتر عشان تتأكد إن المقاس هيبقى مظبوط عليك.
  • اعرف سياسة الإرجاع والتبديل الخاصة بالموقع قبل ما تشتري.
  • اعرف مقاس قرص الساعة وسُمكه عشان تتأكد إنه هيبقى متناسق مع مقاس معصمك.

ساعة اليد مش بس عشان تعرف بيها الوقت، مع إن دي وظيفتها الأساسية، لكن لازم كمان تكون بتعبر عن شخصيتك. فاختار الساعة اللي بتعبر عنك.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

Leave a Reply

Your email address will not be published. Required fields are marked *