حلول مبتكرة لمواجهة حرارة الصيف بدون تكييف

مواجهة-حرارة-الصيف

كتبت: صفاء مجدي

الصيف شادد حيله علينا الكام سنة اللي فاتوا والوضع بيتحول للأسوأ لأسباب بيئية نتجت عن تصرفات البشر غير المبالية بالبيئة لكن مهما بلغت حرارة الصيف ياقوطة  هتواجهها معاكم بحلول مبتكرة لمواجهة حرارة الصيف وبدون تكييف، مع طرق بسيطة ومش مكلفة وكمان صديقة للبيئة بقدر الإمكان.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

التغلب على حرارة الصيف في البيت

  • الستاير مهمة جدًا عشان تعكس أشعة الشمس والحرارة وبالتالي تقلل حرارة البيت.

استثمر في ستاير كويسة من على ياقوطة، تبدأ الأسعار من 175 جنيه مصري.

  • لو بيتك في الدور الأخير زي حالاتي فأنت أكيد حاسس بالمأساة بتاعة السطح اللي بيمتص الحرارة في سقف البيت وجدرانه، وفي عز ما يكون الجو حلو جدًا خارج البيت بيكون جهنم قايدة جوا وعشان كده يجب تغطية السطح بسقف من الخشب أو مادة تعكس الحرارة وتمتصها بدل سقف الدور الأخير.
  • كمان من الخطوات المهمة جدًا لمواجهة الحر: زراعة الأسطح والبلكونات، النباتات وجودها بيمتص الحرارة وبيلطف الجو يمكن مش هتحس بالفرق على الفور ولكنه حل طويل المدى.

شوف على ياقوطة قسم معدات الزراعة

  • حركة الهواء مهمة جدًا في البيت ومش لازم يكون فيه تكييف عشان تخفف الحرارة لكن المروحة سواء كانت سقف أو مروحة واقفة هتفرق في حرارة الجو وتلطفه.

شوف أسعار المراوح من هنا، تبدأ الأسعار من  199 جنيه مصري.

  • فكرت قبل كدة أنك بدل ما توجه المروحة الاستاند عليك أنك توجهها للشباك؟ فكرة غريبة صح؟ هي غريبة ولكن نتائجها كويسة، لو الجو خارج البيت كويس والشباك جايب هواء بارد رغم أن الجو في البيت حر خلي المروحة تبص من الشباك وتشتغل. في الحالة دي المروحة هتشتغل زي الشفاط فتسحب الهواء الساخن اللي في البيت براه ويحل محله الهواء البارد. جربها وقولنا رأيك.
  • الأجهزة المنزلية الكهربائية بتخرج حرارة، جرب تلمس التلفزيون الصبح في بداية اليوم قبل ما تفتحه وقارن بين حرارته دلوقتي وحرارته آخر اليوم بعد ما فضل شغال لفترة طويلة، بيسخن على آخر اليوم صح؟ أي جهاز كهربائي كده. حتى الكمبيوتر بتاعك وبالتالي الأجهزة الكهربائية بتخرج حرارة بتزود من حرارة البيت ككل. وعشان كده اطفي الأجهزة لو مش محتاجها، وحاول تقلل استهلاكك للأجهزة خصوصًا في الأيام الحارة جدًا.
  • لو عندك تكييف فنصيحة ياقوطة أنك تنظفه في بداية كل صيف ومرة كمان مثلًا بعدها بشهرين، تنظيف فلتر التكييف بيفرق بشكل كبير جدًا في كفاءته وهيخليه يبرد الجو أحسن وأسرع وبالتالي توفر في الطاقة.
  • أما بالنسبة للناس أصحاب المراوح زي حالاتي فممكن تحول مروحتك الاستاند لتكييف موفر للطاقة وموفر لفاتورة الكهرباء وده لو حطيت بينك وبين المروحة وفي طريق الهواء طبق كبير فيه ثلج أو حتى زجاجات مياه مثلجة، الهواء هيوصلك ساقع ولطيف وهتحس أنك قاعد على البحر.
  • لو الجو جميل خارج البيت والشباك جايب طراوة ممكن تعمل حركة مبتكرة وهي أنك تعلق على الشباك فوطة أو قماشة زي الستارة بس مغسولة بمياه مثلجة ومعصورة كويس، كده الهواء مش هيجيلك بس بارد لكن ساقع ومنعش.
  • غَير اللمبات إلى لمبات الليد والموضوع مش بس توفير ولكن لمبات الليد بتقلل من انبعاثات الحرارة بنسبة حوالي 70%.
  • بعد ما ترجع من الشغل وتستجم شوية بدل ما تقعد تشتكي من الحر حط رجلك في طبق مياه باردة وأنت بتتفرج على التلفزيون هتفرق في إحساسك بالحرارة.
  • حط كل الكريمات والحاجات اللي بتدهنها على بشرتك زي واقي الشمس في الثلاجة بدل التسريحة وكل مرة هتدهنها على جسمك هتحس بانتعاش.

وقت النوم وتقليل الإحساس بالحر

  • كل ماتكون المخدة اللي نايم عليها ناشفة كل ما هتقلل إحساسك بالحر لأنها هتسمح بالهواء يتحرك حوالين رأسك ورقبتك على عكس المخدات الطرية اللي دماغك هتغوص فيها ومش هتسمح بالهواء يمر بسهولة.
  • البس حاجة خفيفة وطرية جدًا على أد ما تقدر وقت النوم ودا ممكن يخلي نومك أسهل.
  • الاستحمام قبل النوم من الطرق الفعالة جدًا في تقليل شعورك بالحرارة إلى حد كبير لأن هدومك بتكون طرية ومبلولة شوية وجسمك منتعش.
  • في طريقة في النوم في الحر اسمها طريقة النوم المصرية لأنه واضح أن الحر زمان مكانش سهل ولو أني اشك أنهم وصلوا لدرجة حرارة أربعينات زي ما بنوصل الأيام دي. كان المصري بيحارب الحرارة بأنه يجيب ملاية يغمرها في مياه مثلجة وبعدين يعصرها كويس جدًا بحيث متنقطش ويلف نفسه بيها وينام، لو أنت عملت كدا هتنام منتعش ومبسوط وبتدعي لأجدادك الفراعنة.
  • طريقة تانية لو مبتحبش البلل هي أنك تشيل الملاية والغطاء وكيس المخدة في كيس بلاستيك وتحطهم في الفريزر شوية قبل النوم وبعدين افرشهم ونام عليهم.
  • هات فردة شراب نظيفة واملاها أرز وحطها في الفريزر وخدها معاك وأنت نايم حطها على أكتر مناطق بتحس فيها بالحر؛ وده لأن الأرز من النشويات وبيفضل محافظ على حرارته أفضل فترة ممكنة.
  • جسم الإنسان فيه أماكن بتتحكم في حرارة بقية الجسم، يعني الأماكن دي لو باردة الجسم كله هيحس بالبرودة. الأماكن دي هي: المعصم (الرست)، وباطن كوع الإيدين والرجلين، والكاحلين، والرأس، والرقبة، وداخل الفخدين.

خارج البيت ومواجهة حرارة الصيف

  • تجنب الخروج وقت الظهر بقدر الإمكان وخصوصًا في الأيام اللي الحرارة فيها مرتفعة بشكل ضار جدًا.
  • لو خرجت في النهار ماتنساش استخدام كريم واقي للشمس.

شوف أنواع الكريمات الواقية للشمس من هنا، تبدأ الأسعار من 38 جنيه مصري، اشتريها أونلاين بدل ما تنزل تشتريها في الحر.

  • القطن والألوان الفاتحة اختيار مثالي في خروجات الصيف، وابعد بقدر الإمكان عن الخامات الصناعية غير المريحة.
  • لو اضطريت أنك تلبس حاجة مش مريحة عشان مثلًا ظروف شغلك أو أي أسباب تانية، اعمل حسابك تكون أول طبقة ملابس ملامسة جسمك تكون مريحة.
  • اشتري نظارة شمس جيدة تحمي عينيك وتحمي المنطقة المحيطة من أشعة الشمس الضارة. وتقدر تقرأ عن فوائد نظارات الشمس وتختار النظارة المناسبة لو قريت الدليل من هنا.
  • لو هتقضي وقت طويل خارج البيت في الحر وخصوصًا لو هتسافر خلي معاك بخاخ مياه باردة ترشه على وشك كل ما تحس بالحر، وكمان البخاخ ده تقدر تستخدمه مش بس خارج البيت لكن كمان في البيت أو في الأماكن المغلقة زي الشغل، ممكن كمان تخلط معاه ماء ورد لأنها بتفيد البشرة.
  • سوا ء كنت خارج البيت أو داخله فالمياه أساسية جدًا جدًا جدًا. وبدل ما تضيع فلوس كتير على زجاجات مياه صغيرة من الكشك اشتري لك زجاجة مياه من على ياقوطة تقدر تستعملها وتستخدمها عدد لا نهائي من المرات.
  • مفيش حد معين لشرب المياه ويُفضل تشرب مياه بكميات كبيرة طوال اليوم على فترات متفرقة.
  • المياه مهمة جدًا لأنها هتخليك تعرق والعرق مش وحش في الحر بالعكس العرق هو طريقة جسمك في مواجهة الحرارة وكل ما تعرق أكتر كل ما جسمك هيحس بالحرارة أقل، فكل ما تشرب مياه أكتر كل ما هتعرق أكتر ووقتها هتقل حرارة جسمك.
  • ممكن تشرب سوائل أخرى غير المياه لكن يفضل أنها تكون باردة مش ساخنة وتكون قليلة في السكر والكافيين، خليك في العصير الفريش من غير سكر، وابعد عن المياه الغازية بقدر الإمكان.
  • وطالما اتكلمنا عن العرق يبقى لازم نذكر رائحة العرق، وعشان كده مزيل العرق ميفارقش شنطتك طول ما أنت خارج البيت، ويفضل تستخدمه على طول بمجرد ما تخلص شاور وتجدده كل شوية طوال اليوم.

الأكل والتغلب على الشعور بالحر

  • لو أكلت أكل صحي هتعيش أكثر راحة، لو أكلت صح في الصيف هتحس بالحرارة بشكل أقل.
  • خلي عشاك خفيف جدًا لأن الأكل الزيادة مش بس بيتعب الجسم قبل النوم بشكل عام ولكنه هيخليك تشعر بالحر أكتر في الصيف؛ لأن معدل الحرق هيزيد وهيرفع حرارة جسمك فغالبًا مش هتعرف تنام كويس.
  • اتعشى سلطة فواكه أو خضار أو حتى الاتنين مع بعض، ومالوش لازمة خالص ساندوتش الشاورما بالتومية والبطاطس وإن لابد منه فخليه قبل النوم بحوالي 3 ساعات.
  • استعد للمفاجأة دي! الأكل السبايسي هيقلل شعورك بالحرارة! وده لأن التوابل الحارة هتخليك تعرق أكتر وزي ما اتفقنا أن العرق كويس لجسمك ولشعورك بالحرارة.
  • حاول تخلي دايمًا الثلاجة مليانة بأكل ومشروبات باردة زي الزبادي، والفاكهة، والعصائر الفريش وطبعًا المياه الباردة.

رعاية الحيوانات الأليفة في الصيف

  • نظف مكان تواجد الحيوان الأليف أولًا بأول وخصوصًا في الصيف.
  • خلي دايمًا المياه متوفرة للحيوان وسهل الوصول ليها وخليها دايمًا في الظل.
  • اوعى تسيب الحيوان في مكان مقفول ووفر له مساحة مناسبة للحركة.

وأخيرًا ياقوطة بتقولك أنك مش لوحدك وسوا هنقدر نتغلب على الحر ونصحيتنا الأخيرة للتغلب على حر صيف السنة دي هي أنك بدل ما تخرج للفرهدة والحر عشان تعمل شوبنج ادخل شوف اللي عاوزه كله على  yaoota.com  واشتري أونلاين وممكن تدفع عند الاستلام.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.

Leave a Reply

Your email address will not be published. Required fields are marked *