انت لسه بتسمع راديو؟

الراديو

الراديو

فى ناس مصدومة من الراديو وفى ناس لسه بتحبه .. تعالوا نشوف الى اتصدم شاف ايه من الراديو صدموا . والى بيحبه ليه مصمم على رأيه.. ليه فى ناس بتكره الراديو وشايفينه بقى دقة قديمة مينفعش مع ايامنا الى كل ثانية بيتعملها update. ليه فى اراء ضد وفى اراء مع .. بالرغم أن الكل لسه برضه بيسمع بطريقة أو بأخرى الراديو.. حاجة تحير .. تعالوا نشوف..

عن ناس مش بتحب الراديو

هو كان بالنسبة لى انا واصحابى وسيلة تسلية كدا على الصبح ايام المدرسة .. نفتح الراديو من الأى پود iPod ومنها نبدأ نقلبه محطة يمين موجة شمال لحد ما نلاقى حاجة نسف عليها، برامج  مش ماشية مع اهتماماتنا ولا اغانى بتعجبنا.. بس اهو حاجة نتسلى فيها قبل بداية اليوم الدراسى.

دا كله كوم والاعلانات كوم تانى  بس تصدقوا فى الأغرب من الاعلانات الى هحكى لكم عليه حالاً

ليه كارهي الراديو مصدومين بزيادة .. هنفهم منهم دلوقتى 

لأنى اكتشفت ان لسة فى ناس بتستعملو.. ناس ولا هما ضد التكنولوجيا و لا حد من جيل كان الراديو شىء اساسى فى حياته. و كمان مش بتكلم عن الى بيسمعوا الراديو العادى زينا كلنا سواء في العربية ولا فى الأى پود ولا حتى فى الموبايل لأ  دا فى جهاز الراديو أبو اريال شخصيا .. فاكرينوا؟  تخيلوا فى شركات بتصنعه عادى جدا ولا كأن فى تطور حصل فى الدنيا يلغى لزمة جهاز الراديو من الوجود أساسا.

ايه الاسباب الى تخليهم مش طايقين – ابو ايريال – نقول كمان :

–         ليه أمشى بجهاز زيادة طالما ممكن أحشر الراديو دا فى أى حاجة تانية عندى؟

–         ليه أسمع أغانى حد تانى مخترها لما ممكن أنزل أنا الأغانى اللى أنا عايزاها و أسمعها براحتى ؟

–         لو هتقول لى تغيير هقول لك فى تطبيقات applications عملوها بتجيب لك أغانى مش عندك بس على حسب ذوقك انت و اللى بتحب تسمعه. زى ساوند كلاود مثلا.

–         ليه أتفصل كل شوية باعلانات؟

–         ليه أسمع أغنى بصوت مخروش و أنا ممكن أسمعها بجودة كويسة على أى جهاز تانى طبيعى اخترعوه جديد؟

مين فاكر فى زقاق المدق لما الراديو أو “الراديون” طرد الشاعر ابو ربابة من القهوة؟ أهو جه اليوم اللى يطرد فيه الراديون من حياتنا لأن بقى فيه اللى أحسن منه.

ليه الراديو مينفعش يطرد

الراديو ابو ايريال دا له تقدير عند ناس كتير ولو مش عشان التعود .. عشان هو ونس .. اه والله ونس

– الراديو دا ونس فى ايام المذاكرة الصعبة

– الراديو مش مجرد بلاي ليست لمجموعة أغانى

– عشان فى برامج بتناقش مواضيع مهمة ليها مستمعين مهتمين بيها بدليل وجود شركات بتعمل اعلانات تستهدف الجمهور دا ( حتى لو كانت الاعلانات مزعجة وكتير وممكن تشوه القيمة الى الراديو بيقدمها)

– المشكلة مش فى الراديو ، المشكلة فى المحطة الى انت بتختارها عشان تسمعها.. والمذيع الى بتسمعه .. والمحتوى الى المحطة بتذيعه وتشاركك بيه اهتماماتك.

الراديو ابو ايريال دا جميل .. تصدقوا له مميزات برضه

 زعلانين منه ليه بس !!

 –  دا بقي حتى فى راديو محمول ومعاه موجة اف ام و منفذUSB  وذاكرة SD  كمان ، عشان لما تزهق من الراديو تشغل بلاى ليست براحتك.

– الراديو دا بينفع لما الانترنت يرخم ويكون بطىء.

– لما الكهربا تبقى مش موجودة فى منه أنواع تشتغل بالبطارية.

– لما تحب تسيب الدنيا كلها هتلاقى الراديو ابو ايريال دا مسلى وفى منه اشكال حديثة وبتبقى ديكور شكله حلو فى البيت أو المكتب.

الراديو ابو ايريال ونس … الراديو الحديث دا ابن حلال ويا ما وقف معانا فى زحمة المرور واستحمل اشارات المرور بالساعات ..

 منقدرش نستغنى عن الاثنين .. والى بيسمع ابو ايريال ممكن يغير ويجرب اى وسيلة حديثة ثانية ..

جربت انت تستخدم الراديو ابو ايريال قبل كدا ؟

انت بقى مع رأى مين منهم ولا عندك وجهة نظر ثالثة احنا متكلمناش عنها.

Leave a Reply

Your email address will not be published. Required fields are marked *