الكريسماس…7 يناير ولا 25 ديسمبر؟

الكريسماس...7 يناير ولا 25 ديسمبر؟

الكريسماس…7 يناير ولا 25 ديسمبر؟

كتبت: صفاء مجدي

دايما بداية السنة بتكون مليانة احتفالات. سواء الاحتفال برأس السنة الجديدة أو المليون بني آدم اللي عيد ميلادهم يوم 1/1 أو طبعًا الأهم من ده كله الاحتفال بعيد الميلاد أو الكريسماس. ييجي حد يسأل ياقوطة: ألا هو الكريسماس ده يوم 25 ديسمبر زي ما الغرب بيعملوا ولا يوم 7 يناير زي ما بنشوف هنا؟ نقوم نقوله يوم 25 ديسمبر هو يوم 7 يناير. بالظبط احنا كنا متلخبطين لخبطتك دي لحد ما ياقوطة لفت ودورت وجابت قرار الموضوع

أولا كده مصر مش هي البلد الوحيد في العالم اللي بيحتفل بعيد ميلاد المسيح عيسى يوم 7 يناير. لأ ده فيه 15 بلد تانية غير مصر بيحتفلوا بالعيد في نفس اليوم والبلاد دي هي: روسيا وروسيا البيضاء وأوكرانيا وصربيا وكازاخستان وجورجيا ورومانيا ومولودفا ومنتنجرو ومقدونيا وبلجاريا واليونان وفلسطين وإريتريا وإثيوبيا.

ايه الفرق بين 7 يناير و25 ديسمبر؟

الحكاية مش حكاية خالف تعرف ولا غلاسة ولكن السبب في الموضوع كله هو اختلاف التقويم اللي بتتبعه البلاد دي عن التقويم اللي بتمشي عليه أمريكا وفرنسا وغيرها من بتوع 25 ديسمبر.

تعالوا نحكي لكم الحكاية من الأول

مبدئيًا كده يوم ميلاد المسيح عيسى عليه السلام مش متحدد بشكل دقيق لكن العلماء حسبوه بأنه اليوم اللي بيبدأ فيه عدد ساعات الليل في النقصان في مقابل زيادة عدد ساعات النهار وده لأن ميلاد عيسى كان مصدر نور للعالم. واللي أشار لده القديس يوحنا المعمدان اللي قال في إنجيل يوحنا » ينبغي أن ذلك المسيح يزيد وأني أنا أنقص « وميلاد القديس يوحنا بيكون في أول يوم في السنة بيزيد فيه ساعات الليل وتقل ساعات النهار وده في آخر شهر يونيو. المهم اجتمع العلماء في مجمع نيقية عام 325 ميلاديًا على أن اليوم اللي بيبدأ فيه ساعات النهار في الزيادة هو يوم 29 كيهك. وشهر كيهك شهر من شهور التقويم القبطي الـ 12 واللي ابتكره في الأصل أجدادنا الفراعنة. يوم 29 كيهك ده بأه كان بيقابل في التقويم زمان يوم 25 ديسمبر.

بعد كده اكتشف العلماء خطأ في الحسبة دي. لقوا إن اليوم اللي بيبدأ فيه النهار في الزيادة والليل في النقصان بييجي بعد يوم 25 ديسمبر بحوالي 10 أيام وبعد إعادة الحسابات كمان مرة خلال السنين العلماء لقوا إن الفرق المفروض يكون 13 يوم وبكده أصبح عيد الميلاد يوم 7 يناير.

المفاجأة إن مصر فضلت تحتفل بعيد الميلاد يوم 25 ديسمبر لحد ما الانجليز دخلوا مصر وده كان في سنة 1882. (المصدر هنا)

بس هل ده معناه إن الاحتفال بعيد الميلاد يوم 25 ديسمبر ده غلط والناس دي كلها غلط واحنا الـ 16 دولة اللي بتحتفل يوم 7 يناير صح؟

لا طبعا. الفكرة إن احنا واحدة من البلاد اللي لسه بتتبع تقويم يوليوس قيصر والبلاد التانية بتاعة 25 ديسمبر ماشية بالتقويم الجريجوري.

ولو بصيت على الاتنين هتلاقي إن يوم 25 ديسمبر بيقابل يوم 7 يناير بالفعل. يعني الاتنين صح.

تقاليد الاحتفال بالكريسماس في البلاد المختلفة

تعالوا بأه نبص على تقاليد الاحتفال في البلاد المختلفة ونبدأ بأم الدنيا

في مصر عيد الميلاد عند المسيحيين هو تاني أهم عيد بعد عيد القيامة والاتنين فيهم صيام قبلهم. قبل عيد الميلاد بيكون المسيحيين صايمين لمدة 40 يوم عن اللحمة. عشان كده الاحتفال بيتضمن عشاء محترم فيه لحمة وزبدة وبيض وشوربة طبعا بيكون فيه خدمة في الكنيسة في الليلة دي والناس بتشتري لبس العيد وتاني يوم الصبح بيتبادلوا الزيارات والكحك والبسكوت.

في اليونان الاحتفال بيكون مركز على القديس نيكولاس شفيع البحارة وبيحتفلوا احتفالات تمجد البحر.

في إثيوبيا الناس لطيفة أوي باحتفالاتها ونشيطة أوي لأنهم بيحتفلوا بلبس اللون الأبيض ويحضروا الخدمة في الكنيسة وبعدها يعقدوا الدورات الرياضية.

في صربيا بيزين المسحيين بيوتهم بشجرة البلوط. بيشتروها من المحلات أو بيلاقوها في الغابة. والحصول على الشجرة  له طقوس خاصة وغريبة. رب الأسرة بيروح الغابة يدور على الشجرة ولما يلاقي الشجرة المقصودة يقف قبالها مواجها جهة الشرق. وبعدها يرمي بذور على الشجرة ويحييها تحية محددة فيقول « صباح الخير وعيد ميلاد سعيد ليكي» ومرات كمان يشرح لها أسباب قطعها كأنه بيستأذنها ويرسم الصليب ويصلي وبعدها يقطعها باستخدام فأس ولازم الشجرة تقع في اتجاه الشرق وتتقطع بشكل كامل وبدون أي معوقات من البيئة المحيطة وإلا هتجلب اللعنة للبيت.

أما في فلسطين فالاحتفال هناك بيكون عظيم وبتتوجه له عيون العالم كله لأن فلسطين هي مهد المسيح اللي اتولد في بيت لحم اللي بيكون فيها مهرجان كبير للاحتفال من خلال فرق موسيقية والناس بتلبس ملابس على شكل سانتا كلوز وبيوزعوا الحلويات ويزينوا الشوارع بالزينة والأنوار.

في كازاخستان الناس بتحتفل من خلال تبادل الهدايا زي الفطاير والفودكا والنبيذ وغناء الأغاني والرقص.

في أوكرانيا بيحتفل المسيحيون من خلال وليمة فيها 12 صنف بتمثل الحواريين الـ 12. وأصغر طفل في العيلة بيقف في الشباك يستنى يشوف نجمة لامعة في السما اسمها نجمة سيريوس واول ما يشوفها يبدأ الاحتفال.

اقرأ ايضًا: أول من احتفل برأس السنة؟

اكتشف : أفضل 13 قرار لعام جديد سعيد.

وكل ما يخص الاحتفال يمكنك الإطلاع على: زينة الكريسماس، هدايا الكريسماس، هتلبس إيه في الكريسماس؟

ياقوطة بتهني المسيحيين وكل المصريين بعيد الميلاد المجيد ونتمنى تقضوا وقت سعيد.

Leave a Reply

Your email address will not be published. Required fields are marked *