المقارنة الكاملة بين التكييف الصحراوي والسبليت والشباك

كتب: خالد عاصم

الصيف داخل علينا بقوة ولازم نستعدله كويس جدًا، ومن بين أهم طرق الاستعداد دي اتخاذ قرار شراء تكييف جديد، وهنا بتبدأ الحيرة في اختيار التكييف المناسب ليك ولطبيعة المكان اللي انت عايش فيه وكمان لمستوى الميزانية اللي انت مخصصها للخطوة دي، ولو أنت من الناس اللي واقعة في الحيرة دي يبقى المقال ده موجه ليك.

لو محتار تختار ما بين التكييف الصحراوي أو السبليت أو الشباك يبقى لازم تقرا المقال ده عشان تعرف الفروق ما بينهم ومميزات وعيوب كل واحد فيهم وإيه الأنسبلك منهم، ومتنساش تتعرف على عروض أسعار مختلف أنواع التكييفات المتوفرة على ياقوطة وكمان هتقدر تقارن ما بين عروض أسعارها وتطلبها بسهولة من خلالنا.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

ايه الفرق بين التكييف الصحراوي والشباك والسبليت

إيه هو التكييف الصحراوي وبيشتغل إزاي

المقارنة الكاملة بين التكييف الصحراوي والسبليت والشباك

التكييف الصحراوي نوع من أنواع التكييفات اللي بتختلف عن الأنواع المعروفة من حيث طبيعتها وطريقة شغلها وتكوينها، زي إن التكييف المعروف بيعتمد على الفريون وبيتكون من وحدتين، أما التكييف الصحراوي فعبارة عن وحدة واحدة بس وبيعتمد على المية، والتكييف الصحراوي من اسمه نقدر نفهم جزء من طبيعته وهو إنه مخصص للمناطق الصحراوية، يعني المناطق اللي مفيهاش رطوبة أو الرطوبة فيها قليلة، وبيعتمد النوع من ده من التكييفات على المية في تبريد الهواء من خلال إنه بيسحب الحرارة من الجو وبيرجع يطلعه تاني بعد ما بيبخر منه المياه وبيخليه أبرد، وعشان نقدر نفهم طريقة شغل التكييف الصحراوي أحسن خلينا نتعرف على تكوينه الداخلي.

بيتكون التكييف الصحراوي من جسم معدني كبير جواه حوض بيستخدم في إننا نحط فيه المياه، وكمان مروحة قوية بتقدر تسحب الهواء المحيط عشان يمر على الجزء اللي فيه الحشو وهو عبارة عن ألواح معدنية عليها ألياف وقش وبيتم تزويدها بالمياه الباردة، ولما بيمر عليها الهوا السخن بيتحول لهوا بارد وبعد كده بيمر في أنبوب متوصل بالفتحات اللي بتطلع الهوا لبره واللي بيكون فيها فلاتر لتقنية الهواء والعملية ده بتحصل بمجرد الضغط على زر التشغيل وطبعًا بعد تزويد حوض التكييف بالمياه، وبالمناسبة سعة الحوض ده هي الحاجة الأساسية اللي بتفرق بين تكييف والتاني وكل ما كانت سعة الحوض أكبر كل ما زادت قدرة التكييف على الشغل لفترة أطول من غير ما تحتاج تزوده بالمياه تاني.

إيه هو التكييف الشباك وبيشتغل إزاي

المقارنة الكاملة بين التكييف الصحراوي والسبليت والشباك

التكييف الشباك بيكشف من اسمه الطريقة اللي بيتركب فيها بمعنى إنه بيحتاج يتركب فعليًا مكان شباك موجود في الحيطة، ولأن ده مش بيكون متاح على طول، فبيتفتحله فتحه في الحيطة على قده بالظبط عشان يبقى هو اللي زي الشباك، والتكييف الشباك بيتكون من وحدة واحدة بتضمن كل مكونات التكييف بلا استثناء، وبيكون جزء من التكيف مواجه للأوضه من جوا والجزء التاني خارج من الحيطة لبره، وبيتميز التكيف الشباك بسهولة صيانته وحجمه الصغير وكمان بيفضل استخدامه مع المساحات الصغيرة.

إيه هو التكييف السبليت وبيشتغل إزاي

المقارنة الكاملة بين التكييف الصحراوي والسبليت والشباك

التكييف الاسبليت كمان بيتعلق على الحيطة بس مش بيحتاج إننا نفتح فتحة كاملة على قد حجمه في الحيطة، وبيتفتح بس فتحة صغيرة عشان تعدي منها الكابلات والأنابيب اللي بتوصل بين الوحدتين اللي بيتكون منها التكييف وهي وحدة الضاغط Compressor اللي بتبقى موجوده بره، ووحدة المكثف اللي بتبقى موجوده جوا الأوضة، وبيتميز التكييف الاسبليت بشكله الملائمة للديكور العصري وكمان باستهلاكه للطاقة ده غير إنه ملائم أكتر للمساحات الأكبر.

مميزات التكييف الصحراوي

  • التكييف الصحراوي سعره أرخص بكتير من أي تكييف تاني بيشتغل بالفريون.
  • سهل الحركة وتقدر تتنقل بيه من مكان لمكان بسهولة لأنه متركب على عجل.
  • استهلاكه للطاقة أقل بكتير من استهلاك التكييفات العادية لأنه مفيهوش كومبريسور زي اللي موجود في التكييف العادي واللي بيعتمد على طاقة وقدرة كهربية كبيرة عشان يقدر يبرد الهواء.

عيوب التكييف الصحراوي

  • التكييف الصحراوي بيعتمد على إخراج الرطوبة يعني بيزود الرطوبة اللي موجودة في المكان المحيط بيه وده ممكن يتسبب في أضرار على الصحة.
  • عدم تنضيف التكييف بشكل دوري بيخلي الفلاتر فيها بكتيريا وجراثيم وده ممكن يصيب بالأمراض.
  • التعرض المستمر للهواء المبرد المباشر ده ممكن يزود حالات الربو لمرضى الربو.

مميزات التكييف الشباك

  • متكون من وحدة واحدة بس فتركيبة سهل جدًا ومش بيتكلف فلوس كتير في تركيبه خصوصًا ل هيتركب مكان شباك فعلي، وكمان سهل أول إنك تنقله لو حبيت تغير مكانه أو حبيت تسيب شقتك وتنقل لمكان تاني
  • سعره منخفض جدًا مقارنة بالتكييف السبليت بس أغلى من التكييف الصحراوي طبعًا
  • صيانة النوع ده من التكييفات سهل جدًا بفضل تصميمه المدمج وإن كل مكوناته موجودة في علبة واحدة منظمه وبسيطة التفاصيل

عيوب التكييف الشباك

  • التكييف الشباك بيكون شكله واحد ومش بيختلف وعلى الأغلب كمان بيكون بلون واحد وهو اللون الأبيض، وتصميمه مش جذاب أوي
  • أقصى سعة تبريد للتكييف محدودة لحد ٢ طن وده بيخليه مناسب لمساحات أصغر من التكييف السبليت
  • التكييف الشباك صوته عالي ومزعج لحد كبير وده من بين أبرز عيوبه

مميزات التكييف السبليت

  • التكييف الاسبيلت مثلًا شكله عصري جدًا وكمان بييجي بألوان وتصاميم مختلفة مش بس هتتناسب مع ديكور الشقة أو الأوضه، لا ده ممكن كمان يضيف ليها لمسة ممتازة جدًا
  • سعة التبريد للتكييف الاسبليت مش مقيدة عند ٢ طن بس وعشان كده بستخدم التكييف الاسبليت في توفير قوة تبريد كافية للمساحات الكبيرة
  • صوته أقل ويكاد يكون مالوش صوت أصلًا في حالات كتير لأن الوحدة المسؤولة عن الضوضاء والإزعاج بتبقى موجودة برة البيت

عيوب التكييف السبليت

  • التكييف الاسبليت بيتنقل برضه لو حبيت تغير مكانه بس بيحتاج شغل أكتر في تركيبه وفي شيله وكمان نقله صعب أكتر لأنه مكون من وحدتين كبار بيستهلكوا مساحة كبيرة في النقل ونسبة تعرضهم للأذى خلال النقل أكبر
  • سعر التكييف الاسبليت بيتكلف تقريبًا ضعف التكييف الشباك اللي بنفس قدرة التبريد، يعني لو تكييف سبليت بسعة تبريد ١٫٥ طن هيكلفك ضعف سعر التكييف الشباك بسعة تبريد ١٫٥ طن برضه
  • التكييف الاسبليت معقد جدًا وبيحتاج متخصص خصوصًا لو العيب كان في الوحدة الخارجية وكمان اكتشاف المشاكل فيه أصعب من باقي التكييفات

شوف كل أنواع التكييف الصحراوي المتوفرة على ياقوطة من هنا.

شوف عروض أسعار مختلف التكييفات المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *