إزاي تشتري أفضل سخان مياه في مصر

شراء-السخان

كتبت: صفاء مجدي

سخان المياه من المنتجات المنزلية الأساسية وده لأن محدش فينا يقدر يستغنى عن دش المياه السخنة في ليلة شتاء باردة يريح الأعصاب ويضمن نومة مريحة. ده غير الناس اللي بتحب تستحمى بمياه ساخنة سواء صيفًا أو شتاءً. وطبعًا إلى جانب الاستحمام متقدرش تستغني عن المياه السخنة في غسيل الاطباق أو غسيل الملابس والتنظيف بشكل عام. ولما تكون نازل تشتري سخان جديد فانت أكيد عاوز سخان يعيش معاك أطول وقت ممكن بكفاءة عالية طول المدة دي، وغالبًا بتفكر هل تشتري سخان غاز أم سخان كهربائي؟

لهذا ياقوطة النهاردة هتساعدك تختار وتشتري السخان المثالي بحيث في نهاية الدليل تكون حددت بسهولة سخان المياه المناسب لك وتشتريه بالاسم وتدخل على ياقوطة تشتريه بأحسن سعر في السوق وكمان يوصلك لحد بيتك بدون لف وفرهدة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

لما تيجي تفكر في شراء السخان هتقابلك شوية أسئلة:

  • يا ترى اشتريه غاز ولا كهرباء؟
  • أجيب سخان سعته قد إيه؟
  • يا ترى السخان ده هيوفر في فاتورة الكهرباء ولا هيقطم وسطي؟
  • يا ترى النوع ده أمان ولا لأ؟

دي معظم الأسئلة الأساسية اللي بتيجي في بال أي حد بيفكر في شراء سخان جديد. ولحسن الحظ ياقوطة النهاردة هتساعدك تجاوب على كل واحد منها بإجابة محددة.

أنواع الخزانات حسب السعة وطريقة العمل

السخان بخزان

 

  • النوع ده بيكون سخان كهرباء.
  • بيشتغل بالكهرباء وبياخد وقت معين في تسخين المياه اللي في الخزان المعزول بتاعه ويحفظها في درجة حرارتها لحين الحاجة إليها.
  • طبعًا كل ما كان الوقت اللي بياخده السخان في تسخين المياه قليل كل ما يكون أحسن عشان هتحصل على مياه سخنة أسرع لكن برده فكر في استهلاك الكهرباء.

للاطلاع على أسعار سخان الكهرباء في مصر من هنا.

سخان مياه سخنة عند الطلب

  • وده بيكون السخان الغاز اللي بيسخن المياه وهي ماشية في الماسورة بدون ما يخزنها.
  • فيه منه أنواع كهرباء ولكنها نادرة شوية وكمان بتحتاج دايرة كهربية مخصوصة ومختلفة عند تركيبها
  • مجرد ما تفتح حنفية المياه السخنة يقوم الشعلة تشتغل وتسخن المياه على قد طلبك.

للاطلاع على أسعار سخان الغاز في مصر من هنا.

من حيث استهلاك الطاقة

  • من حيث استهلاك الطاقة فالواقع بيقول إن الغاز استهلاكه أقل بشكل عام لأنه بيشتغل بس تحت الطلب على عكس السخان ذو الخزان اللي بيسخن كمية كبيرة من المياه جايز أصلاً متكونش محتاج لها في الوقت الحالي وعلى ما تحتاج لها يكون المياه بردت وبالتالي تستهلك كهرباء تاني في تسخينها مرة تانية.
  • بس في نفس الوقت السخانات الغاز مش بتسخن في المرة الواحدة أكتر من عدد معين من اللترات. العدد ده قد يكون مناسب ليك أو لأ على حسب استهلاكك للمياه وكمان عدد أفراد الأسرة.
  • في أغلب الأحيان لو كنت هتفضل اختيار سخان الغاز وعدد أفراد أسرتك كبير فانت هتحتاج سخان للحمام منفصل عن سخان المطبخ وهكذا عشان تقدر توفر المياه الساخنة للاستخدامات المتعددة.
  • السخانات ذات الخزان مناسبة أكتر لأسرة عدد أفرادها كبير.
  • في خزانات السخان الكهرباء من الأمور الهامة جدًا أنها تكون معزولة كويس جدًا عشان تفضل محتفظة بدرجة حرارتها لمدة أطول توفر لك في استهلاك الكهرباء.
  • كمان مهم أن يكون الخزان له طبقة من الزجاج أو البورسلين في الداخل تحميه من الصدأ والتآكل.

تشتري سخان غاز أم سخان كهرباء؟

  • الإجابة على السؤال ده بسيطة! اختار على حسب نوع الطاقة المتوافرة في منطقتك والسهل الحصول عليها.
  • لو أسهل لك الحصول على الكهرباء دون الغاز يبقى انت كده اتحددت بسخان كهرباء ولو كان أسهل لك توفر مصدر طاقة غاز للسخان فاشتري السخان الغاز.
  • لو عندك الكهرباء والغاز متوافرين بسهولة يبقى فكر في حاجة تانية هامة وهي ضغط المياه
  • أجمع مستخدمي السخانات الغاز أن لو ضغط المياه ضعيف في بيتك ولو كنت من سكان الأدوار العليا فابعد عن سخان المياه الغاز تمامًا لأنه بيحتاج ضغط مياه كويس عشان يشتغل حلو على عكس السخان الكهرباء اللي مش بيتأثر بالموضوع ده.
  • لو عندك كهرباء وغاز متوافرين بسهولة وكمان ضغط مياه قوي تختار إيه؟ زي ما ذكرنا اختار على أساس استهلاكك وعدد أفراد بيتك، لو استهلاك كبير يفضل الكهرباء ولو استهلاك قليل أو متوسط يفضل الغاز.
  • على الرغم من إن سخانات المياه الكهربائي أغلى من الغاز إلا إنها ممكن تكلفك أكتر على المدى الطويل لأن الكهرباء أغلى من الغاز.
  • سخانات الغاز بتعيش مدة أطول ممكن توصل لحوالي 20 سنة وكمان لها قطع غيار لو غيرتها هتزيد من عمر السخان.
  • لكن سخانات الخزان بتعيش أقل نظرًا لأن المياه لما بتتخزن فيها ممكن تسبب تآكل في الخزان، وبتعيش في المتوسط حوالي 10-15 سنة.
  • السخان الغاز فيه ميزة كويسة وهي إنك مش هتشيل هَم المياه الساخنة في حالة انقطاع الكهرباء على عكس السخان الكهربائي. دي ميزة رائعة جدًا لو كنت من سكان المناطق اللي بتقطع فيها الكهرباء بشكل مستمر.

سعة الخزان

  • تتوقف على عدد أفراد الأسرة ومعدل استخدام السخان في الاستحمام والغسيل سواء غسيل الإيدين أو غسيل الأطباق أو غسالة الأطباق أو غسالة الملابس.
  • تتنوع مقاسات السخانات في منها مقاسات صغيرة، ووسط، وكبيرة:
    • المقاسات الصغيرة مناسبة لفرد أو اتنين أو ثلاثة بالكتير أوي
    • المقاسات الوسط مناسبة لاستهلاك 3-4 أشخاص
    • المقاسات الكبيرة مناسبة لاستهلاك 4-6 أشخاص
  • بالنسبة للسخانات الغاز اللي من غير خزان هتقارن بين الأنواع المختلفة من حيث كمية المياه اللي بتقدر تسخنها في ساعة واحدة وعلى أساسه تختار النوع والسعة الأفضل لأسرتك.
  • وبشكل عام ده معدل استهلاك المياه في الدقيقة للأنشطة المنزلية المختلفة، الأرقام دي هتساعدك تحسب السعة المناسبة لاستهلاكك:
    • حنفية المياه العادية 2- 5.7 لتر في الدقيقة
    • حنفية المطبخ 11- 26 لتر في الدقيقة
    • الاستحمام/شاور 3.8- 7.6 لتر في الدقيقة
    • غسالة الأطباق 3.8- 9.5 لتر في الدقيقة
    • غسالة الملابس 7- 11.4 لتر في الدقيقة

الصيانة وعوامل الأمان

  • اختار السخان اللي تكون صماماته نحاس مش بلاستيك عشان تعيش فترة أطول.
  • تأكد من سلامة صمام البخار الموجود في السخان الكهرباء اللي بخزان لأن الصمام ده بيطلع البخار الزيادة في حالة ارتفاع درجة الحرارة ،وهو من عوامل السلامة والأمان لأن الصمام ده بيمنع حدوث مشاكل زي انفجار الخزان من كتر الضغط لا قدر الله.
  • السخان الغاز يحتاج توفر له منفذ هواء أو مدخنة عشان تطلع الغاز برة وإلا يسبب اختناق.
  • وتأكد أن شعلته شغالة على طول ومش بيسرب غاز.
  • لو كنت مسافر وسايب البيت لفترة، افصل السخان تمامًا سواء كان غاز أو كهرباء.
  • السخان اللي بخزان بيحتاج صيانة دورية أكتر من السخان اللي من غير خزان وده لأن الخزان ممكن يكون بيتآكل من الداخل.
  • لو سخانك بخزان لازم تفضيه كل ثلاث شهور وتتأكد من أن الحلة كويسة ومش متآكلة واعمل صيانة سريعة على الثرموستات والصمامات كل ست شهور.
  • عند تركيب الخزان لأول مرة بالتأكيد يجب الاستعانة بأخصائي يراجع كل الوصلات ويتأكد من سلامتها 100%.
  • لما تركب السخان الغاز تأكد من وجود مصدر تهوية ومصدر غاز قريب منه وطبعًا مصدر للمياه.
  • اقرأ واتبع تعليمات السلامة والأمان في الكتالوج اللي مع السخان قبل ما تركبه وعرف أفراد أسرتك كلهم معايير السلامة المذكورة.
  • عشان توفير الطاقة حاول ترشد من استهلاك المياه الساخنة بحيث تستخدمها عند الحاجة ، وكمان حاول ترشد في استهلاكها عند غسيل الملابس أو الأطباق قدر الإمكان.
  • فيه أنواع خزانات بتوفر زرار للصيف وواحد تاني للشتاء عشان توفر في الاستهلاك والطاقة.
  • متتأخرش في تصليح أي عطل في الجهاز للحفاظ عليه لمدة أطول.

ضمان السخان

فكر في الضمان لأنه من المميزات المهمة جدًا في شراء السخان. الضمان بيكون غالبًا من 3 سنين لحد 12 سنة اختار السخان اللي يكون له أطول فترة ضمان.

وأخيرًا بعد ما تكون حددت مواصفاتك سخان المياه المثالي ادخل على ياقوطة قارن بين الأنواع المختلفة وشوف السعر المناسب

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

Leave a Reply

Your email address will not be published. Required fields are marked *