ابدأ مغامرتك: تاخد معاك إيه في رحلة المغامرة؟

1b3easqwer

كتبت: شذا وليد

“إن أسعد لحظة في حياة الإنسان.. هي التي يُغادر فيها إلى أراضٍ غير معروفة”. مقولة قالها مُستكشف وكاتب إنجليزي اسمه سير ريتشارد بورتون واللي بتلخّص متعة السفر بشكل عام. على قد ما السفر بيبقى ساعات كتير غير متوقع ومثير، بس دايمًا بيخلي عقولنا وقلوبنا مُتَفَتِحة لأفكار وثقافات عمرنا ما فكرّنا فيها قبل كده. السفر بيخلينا نطلَع بره منطقة الراحة بتاعتنا ويخلينا نخوض تجارب جديدة ومختلفة. انت ممكن تجني الفوائد دي من السفر السياحي العادي، لكن لو عايز حاجة مش عادية، يبقي عليك وعلى سفر المغامرة. ياقوطة هتقولك على أهم النصائح اللي ليها علاقة بسفر المغامرة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

إزاي ابدأ سفر المغامرة؟

سفر المغامرة هو سياحة لغرض تجربة أنشطة جريئة وغير معتادة، واللي بتبقى محتاجة لياقة بدنية معقولة أو عالية كمان. الموضوع كله بدأ سنة 1967 في سان فرانسيسكو لما ليو دي بون عَمَل أول رحلة مغامرة لنيبال. دي بون بدأ أول شركة سياحة متخصصة في سفر المغامرة والموضوع ابتدى يشتهر من ساعتها. عشان كده بقي لقبه “الأب الروحي لسفر المغامرة”.

عن مشروع سفر

عشان نعرَف أكثر عن سفر المغامرة، ياقوطة اتكلمت مع عبد الرحمن عمرو، مؤسس موقع مشروع سفر، وهو موقع متخصص في كل تفاصيل السفر وإجراءات الفيزا وأساسيات التحضير للسفر والأماكن السياحية والسفر بتكلفة معقولة، وغيرها من المواضيع اللي تهم أي مسافر. “أنا كنت عايز المسافرين المصريين يبقى عندهم موقع عليه كل التفاصيل المتعلقة بالسفر”، شَرَح عمرو.. “وكون إن كل المشاركات والمقالات اللي بننشرها بالعربية العامية بتخلي فهمها يبقى أسهل على الناس.”. والمقالات دي بتكون مكتوبة من ناس سافرت قبل كده وحابين يحكوا عن رحلاتهم أو كاتبها عمرو نفسه عن رحلاته. صفحتهم على الفيسبوك عليها حاليًا أكثر من 28,000 مُشارك.

تفاصيل أكتر عن سفر المغامرة

لما سألنا عمرو عن سفر المغامرة في مصر، قال لنا إن “الموضوع بدأ يكبر بشكل معقول وبقى في شركات أكتر مسئولة عن تنظيم رحلات مغامرة جوه وبره مصر.” من شركات السياحة المتخصصة في سفر المغامرة في مصر جازف ووايلد جوانابانا وديستينيشن 31.

الشخصية بتلعب دور كبير مع سفر المغامرة. “أهم حاجة أنت بتحب تعمل إيه، لو فكرة إنك تخيّم في الصحراء أو تصحى تلاقي نفسك في غابة تعجبك، ييقى سفر المغامرة مناسب ليك. لو الفكرة دي ماخلتكش تتحمس، يبقى متعملهاش.” شَرَح عمرو. خلي بالك إن سفر المغامرة محتاج لياقة بدنية عالية عشان كده يُفَضَل إنك تحضّر جسمك من قبلها. تمارين القلب والأيروبكس بتساعد على التوازن وتحسين صحة القلب. كمان اليوجا بتخلي جسمك مَرِن أكتر.

بتحب الكتابة وعايز تحتفظ بكل ذكريات رحلاتك؟ اشتري واحدة من مذكرات السفر دي عشان تكتب كل التفاصيل.

تروح رحلة مغامرة لوحدك ولا مع صُحابك؟ ده سؤال مهم. عمرو رَد علينا وقال: “سفر المغامرة مفروض يبقى عن اكتشاف الذات. لو روحت لوحدك هيبقى عندك فرصة أحسن إنك تكتشف نفسك وتقابل ناس جديدة. بس برضه لو رحت مع صُحابك الرحلة هتبقى مألوفة وممتعة أكثر. فالموضوع ببيقى على حَسَب انت عايز إيه”.

تاخد معاك إيه في رحلة المغامرة؟

أكيد جه في بالك إن التحضير لسفر المغامرة مش هيبقى زي ما بتحضّر لرحلة سياحية عادية. الأساسيات واحدة بس في كام حاجة زيادة محتاج تاخدهم معاك عشان تستمتع برحلة مثيرة وآمنة. عمرو قال لياقوطة على الحاجات المهمة اللي لازم الواحد ياخدها في رحلة المغامرة:

  • سفر المغامرة بيبقى أسهل كتير وانت معاك شنطة ظهر. عشان التخييم والرحلات أكيد مش هيبقى ممتع وانت بتجُر وراك شنطة سفر. تقدر تبُص على مجموعة حقائب الظهر هنا.
  • عشان هتقضي أغلب الأيام بره مش في فندق، هتحتاج حاجة تنام فيها، وهي كيس النوم. لازم تبقى عارف جو وطبيعة المكان اللي أنت رايحه عشان أكياس النوم بتبقى مُصَنعة لأجواء مختلفة. بُص على ملصق المعلومات قبل ما تشتري. تقدر تبُص على كيس النوم المموه ده.
  • الخيمة هيحاجة أساسية في رحلات المغامرة. تقدر تبُص على مجموعة الخيمات هنا.
  • وانت بتستكشف الأماكن الجديدة، هتحتاج كشاف عشان تنوّر طريقك، ومتنساش تاخد معاك بطاريات زيادة.
  • البطانيةهتنفعك لو الدنيا برّدت. تقدر تبُص على البطانيات هنا.
  • عشان أكيد هتبقى بره طول اليوم، هتحتاج كريم واقي من الشمس عشان تحمي نفسك من أي حروق أو التهابات في الجلد. اشتري الكريم الواقي من الشمس المناسب لنوع بشرتك.
  • بمناسبة الشمس، هتحتاج نظارة شمس عشان تحمي عينيك من أشعة الشمس الضارة. اتفرج على تشكيلة نظارات الشمس هنا. وعشان تعرف أكثر إزاي تختار نظارة شمس مناسبة ليك، تقدر تبُص على المقالة دي دليل ياقوطة لاختيار نظارة الشمس المناسبة.
  • صندوق الإسعافات الأولية أساسي معاك، بالذات وانت بره. مفروض ييبقى فيه الأدوية الأساسية للصداع والمغص والإسهال وحروق الشمس، بجانب أي أدوية مخصوصة انت متعود تاخدها.
  • جهاز تحديد الموقعهو رفيقك في رحلة المغامرة. ممكن تشتري واحد من هنا.
  • على حَسَب نوع رحلة المغامرة اللي انت رايحها، لازم تجيب معاك المعدات اللازمة ليها، سواء غطس أو تسلق جبال أو تخييم.
  • أكيد هتحتاج السكين السويسري وانت مسافر. ممكن تشتري واحد يناسب احتياجاتك هنا.
  • بالنسبة للملابس، لازم تبقى بسيطة ومريحة. “الجينز والتي شيرتات هتبقى مناسبة جدًا عشان سهل تتحرك بيهم وسهل تغسلهم بسرعة لو احتجت”.. نَصَح عمرو.

إزاي التسوق أونلاين بيساعد مسافري رحلات المغامرة؟

بكل الأساسيات اللي انت محتاج تشتريها، لازم الواحد يلاقي طريقة سهلة وسعرها معقول عشان يشتري كل ده. “التسوق أونلاين سهلّ على المسافرين إنهم يجيبوا كل اللي محتاجينه. بالذات مع سفر المغامرة عشان المعدات والأدوات اللي بتحتاجها بتكون متخصصة أكثر، التسوق أونلاين بيخليك تلاقي أسعار معقولة للحاجات دي”.. قال عمرو.

أماكن حلوة لسفر المغامرة حول العالم

اتحمست لرحلة مغامرة صح؟ دول أماكن رائعة لسفر المغامرة، جوه وبره مصر.

  • التخييم فيدهب، قريب من شرم الشيخ هتكون فكرة ممتازة عشان تبدأ رحلات المغامرة المحلية. اوعى تفوّت زيارة البلو لاجون الخلاب.
  • سانت كاترين قريب من سيناء مكان مناسب لمحبي تسلق الجبال. فيه هناك برضه آثار فرعونية ورومانية لمحبي التاريخ. “هي رحلة مش سهلة، بس تستاهل جدًا”، قال عمرو عن رحلته لسانت كاترين.
  • رحلة سفاري في زانزيبار في تنزانيا مفروض تكون على قائمة الحاجات اللي نفسك تعملها.
  • لو بتحب الحياة المائية، يبقى هتحب تروح جزر جالاباجوس في الإكوادور واللي فيها هتشوف أنواع مميزة من الحيوانات وكمان تقدر تمارس الغطس وركوب الأمواج والتنزه.
  • مش بتحب الشمس قوي؟ يبقى أكيد هتحب جبال الألب السويسرية. ده أكثر مكان مناسب لمحبي التزلج على الجليد.

إزاي السفر ممكن يغيّرك؟

السفر بيخليك تخرج من دائرة الحاجات المُعتادة ويخليك تخوض تجارب مختلفة. عمرو زار حوالي سبع دول وشخصيته اتغيّرت كتير من ساعتها. “السفر خلاني أكثر تواضعًا وتفتحًا” قال عمرو، “أنا شخصيًا بحب أقعد مع أهل البلد واتكلم معاهم على ثقافتهم وأفكارهم ومعتقداتهم. الموضوع ده بيوسّع مداركك بشكل كبير.”.

إيه الجديد بالنسبة لمشروع سفر؟

“أنا ناوي أسافر أماكن غير معتادة وليها علاقة بالمغامرة أكتر الفترة الجاية عشان أقدر أقدم للناس معلومات متنوعة أكتر”.. قال عمرو. “أنا برضه عايز أضيف صور وفيديوهات وبوستات على سناب شات عشان المعلومات توصل بسهولة للناس.”.

مستني إيه؟ خُد شنطة ظهرك (وكل الحاجات اللي اتكلمنا عنها في المقال هنا) وابدأ مغامرة تغيّر حياتك.

رحت أي رحلة مغامرة مؤخرًا؟ شاركنا بتجاربك.

قد تنفذ المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com في فيسبوك.

Leave a Reply

Your email address will not be published. Required fields are marked *