أيهما أفضل الفرن الغاز ولا الكهرباء؟
كتبت: منى عوض
عادة اختيار الفرن الغاز أو الفرن الكهرباء بيكون تفضيل وراحة شخصية، بس دا مش معناه إن الناس مش بتحتار وهي بتشتري أو بتحدد أنهي الأفضل.
عشان كدا ياقوطة حبت إنها تجاوب على أي أسئلة بتدور في بالكم خاصة بالموضوع دا وهتوضح الفرق بين الفرن الغاز والفرن الكهرباء، ولو حبيت تشتري أي واحد منهم في العموم تقدر تطلبه من خلالنا وهيوصلك في أقرب وقت ممكن.
بنفكرك إنك ممكن تشتري الفرن الغاز والفرن الكهرباء من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
الفرن الغاز
المميزات
- واحدة من المميزات اللي بيتمتع بيها فرن الغاز هو قدرته على الطهي بجودة عالية وبالتالي هتقدر تحصل على طعام شهي ومستوي كويس جدًا.
- الفرن الغاز بيقدر يخلص الأكل بسرعة جدًا كل اللي عليك إنك تراقبه كويس بس.
- فيه أنواع من فرن الغاز بتكون مزودة بمروحة داخلية لتوزيع الهواء الساخن في جميع الأنحاء بشكل متساوي وبالتالي تسوية الأكل بشكل أفضل.
- تقدر تعرف الفرن الغاز شغال أو لأ بكل سهولة من خلال الشعلة بتاعته.
- ضبط درجات الحرارة بيكون أسرع ومش هتحتاج تستنى وقت لحد ما درجة حرارة الفرن توصل للمستوى اللي إنت محتاجه.
- استهلاك الغاز أقل بكتير من الكهرباء وبالتالي الفرن الغاز هيكون أوفر خصوصًا لو كان عندك غاز طبيعي.
- هتضمن استمرارية تشغيله لأطول فترة ممكنة طول ما الغاز الطبيعي موجود أو حتى أنبوبة عادية.
العيوب
- فرن الغاز طبيعته بتنطوي على مخاطر محتملة.
- فيه ناس بتبقى شايفة إنه صعب التشغيل أو بتخاف من النار عمومًا يعني.
- الفرن الغاز بيحتاج مجهود شوية عشان تقدر تنظفه كويس.
- هيكون صعب شوية تنقله من مكان لآخر لأنك هتحتاج تكلم فني متخصص عشان مواسير الغاز أو لو عندك أنبوبة هتحتاج تنقله بالأنبوبة وبالتالي هيشغل مساحة كبيرة.
- سعره غالي شوية مقارنة بالأفران الكهربائية.
تقدر تختار الفرن الغاز الأنسب لاحتياجاتك من هنا.
الفرن الكهرباء
المميزات
- من السهل تشغيل فرن الكهرباء كل اللي عليك إنك تظبط درجة الحرارة وتلف البكرة المسؤولة عن التشغيل وتظبطه كمان على الوقت اللي إنت عايزه وهو هيفصل لوحده.
- آمن جدًا في استخدامه ومش هيخليك تقلق من أي تسرب للغاز ولا حرائق ولا أي لسعات ناتجة عن النار، ودا مش معناه إنك آمن تمامًا لأنك عرضة أيضًا للماس الكهربائي.
- توزيع الحرارة فيه كويس جدًا وبيتم بالتساوي في جميع أنحاء الفرن خاصة لو كان من النوع اللي بيكون مزود بمروحة داخلية.
- من السهل تنظيف الفرن الكهرباء بقطعة قماش مبلولة خفيف جدًا وملهوش شعلات ولا ألواح هتحتاج تشيلها على عكس الفرن الغاز.
- بعض الأفران الكهربائية بتتميز بوجود خاصية التنظيف الذاتى اللي بتعمل من خلال رفع درجه حرارة الفرن إلى مستويات عالية تعمل على إذابة الدهون تمامًا وبالتالي بيبقى من السهل مسحها وتنظيف الفرن بشكل كويس وسهل.
- سهل تنقل الفرن الكهرباء من مكان لآخر كل اللي هتكون محتاجه بس فيشة كهرباء.
- الأفران الكهرباء سعرها كويس وفي متناول الجميع تقريبًا.
العيوب
- بياخد وقت أطول في التسخين والوصول لدرجة الحرارة المطلوبة وكمان في طهي الطعام.
- بيستهلك كميات كبيرة من الكهرباء.
- لو الكهرباء قطعت مش هتعرف تخلص اللي كنت بتعمله في الفرن.
تقدر تختار الفرن الكهرباء الأنسب لاحتياجاتك من هنا.
أيهما أفضل الفرن الغاز ولا الفرن الكهرباء؟
من الصعب جدًا نقولك أنهي أفضل في الاتنين خصوصًا إن كل شخص بيختار حسب إمكانياته واحتياجاته وبيختار الشئ اللي يريحه ويقدر يتكيف معاه، بس خلينا نقول إن المميزات والعيوب اللي استعرضناها من شوية تقدر تساعدك.
وفي العموم خلينا نقول إنك هتقدر تحصل على أكل شهي لو استخدمت أي واحد من الأتنين بس لو إنت بتدور على تكلفة بسيطة في الأول وعندك استعداد تتحمل فواتير الكهرباء وعايز استخدام سهل وينجزك على طول يبقى الفرن الكهربائي أنسب ليك، أما لو معندكش مانع في شراء فرن سعره مرتفع شوية وعندك غاز أو حتى قادر تغير أنابيب الغاز ومش حابب تتحمل ارتفاع فواتير الكهرباء وكمان عايز أكل شهي جدًا ودرجة تسويته صح زي الكتاب ما بيقول يبقى الفرن الغاز أنسب ليك.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.