كتب: خالد عاصم

لما بنيجي نشتري تليفزيون أو شاشة كمبيوتر أو حتى لما بنيجي نشتري موبايل جديد بنلاحظ إن فيه معلومة رئيسية متعلقة بكل الشاشات دي وهي الجودة والدقة واللي بيترمز لها بطريقتين أساسيتين، الأول باستخدام الحروف زي HD وFHD وUHD/4K والطريقة التانية هي طريقة الأرقام زي 720p و1080p و2160p وكلها اختصارات بتؤدي في الآخر لنفس المعنى الأساسي وهو جودة الشاشة اللي بتوضح دقتها وعدد البيكسلات فيها.

الرموز والأرقام دي ممكن تكون بتسبب شوية لخبطة عند بعض المستخدمين، وبتوقعهم في حيرة الاختيار لو هما ما يعرفوش الفروق والاختلافات بين جودة شاشة من جودة شاشة تانية، ولو ما يعرفوش إيه معنى كل جودة وليه كل واحدة بتكون أعلى من اللي قبلها.

الحيرة دي هي اللي هنحاول من خلال المقال ده إننا نعالجها وهنحاول نشرح معنى كل جودة خاصة بالشاشة وإيه الفروق الرئيسية والفرعية بين كل جودة، وفي خلال المقال هنستعرض مجموعة من التليفزيونات اللي هنستخدمها كنماذج وأمثلة عن جودة الشاشات، وطبعًا تقدروا تطلبوا الشاشات دي من خلالنا في ياقوطة وهتوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الاختلافات بين الشاشات بجودة HD وFHD و4K

تعريفات أساسية لأنواع جودة الشاشات

من خلال السطور الجاية هنشرح بشكل مختصر في الأول مختلف أنواع جودة مختلف الشاشات من أول أضعف جودة واللي مابقتش مستخدمة في الشاشات الاستهلاكية اللي نعرفها لحد أعلاهم واللي لسا مانتشرتش بشكل كبير في الأسواق.

جودة qHD

اختصار qHD بيرمز لجملة Quarter High Definition أو ربع الجودة العالية، والجودة دي بترمز بدقة بيكسلات ٩٦٠ بيكسل × ٥٧٠ بيكسل، يعني ربع دقة جودة 1080p أو FHD ومن هنا جت تسميتها لأن دقتها بتمثل ربع دقة FHD أو ربع الجودة العالية الكاملة اللي دقتها ١٩٢٠ × ١٠٨٠، والجودة دي مش مستخدمة في المنتجات الاستهلاكية المعتادة زي شاشات التليفزيون والموبايلات وشاشات الكمبيوتر وممكن تكون متوفرة في الأجهزة المتخصصة زي شاشات الأجهزة الطبية مثلًا.

جودة SD

بترميز SD للجودة القياسية أو Standard Definition، والجودة دي دقتها بتبلغ ٧٢٠ × ٤٨٠ بيكسل وبتعتمد على معدل حجم شاشة ٤:٣ وعلى ٤٨٠ خط أفقي من دقة البيكسلات، وكانت جودة SD هي المستخدمة في بداية عصر الشاشات الاستهلاكية وكانت متوفرة في التليفزيونات القديمة ومعروفة بمسمى PAL بجودة ٧٢٠ × ٥٧٦ بيكسل.

جودة HD

جودة HD أو High Definition والمعروفة كمان باسم 720p، ودي تعتبر دلوقتي هي الجودة القياسية وتعتبر بداية عصر الشاشات عالية الجودة واللي دعمت الشاشات المختلفة بجودة أفضل وصورة أحسن بكتير من اللي كانت بتوفرها جودة SD اللي مابقتش بطبيعة الحال مستخدمة دلوقتي، وبتعتمد الجودة دي على دقة ١٢٨٠ × ٧٢٠ بيكسل، والجودة دي باختلاف معدلات دقتها هي اللي متوفرة في أجهزة استهلاكية كتيرة زي الموبايلات الاقتصادية ومنها مثلًا Samsung Galaxy A10

شوف عروض أسعار موبايل Samsung Galaxy A10 من هنا.

وكمان متوفرة في عدد من شاشات التليفزيون اللي سعرها رخيص زي تليفزيون ATA ٣٢ بوصة بجودة HD

شوف عروض أسعار تليفزيونات ATA المتوفرة على ياقوطة من هنا.

جودة FHD

جودة FHD أو Full HD أو Full High Definition واللي ممكن نسميها بالجودة العالية الكاملة والمعروفة كمان باسم 1080p، وتعتبر جودة FHD هي الجودة القياسية دلوقتي بمعنى إنها الجودة الأساسية اللي بتصدر بيها مختلف الشاشات سواء شاشات التليفزيون عالية الجودة، زي مثلًا تليفزيون Samsung UA43N5300 بقطر ٤٣ بوصة الذكي

شوف عروض أسعار تليفزيونات سامسونج المتوفرة على ياقوطة من هنا.

وكمان موبايلات كتير بتعتمد على شاشات بجودة FHD زي Xiaomi Mi 9T على سبيل المثال

شوف عروض أسعار موبايل Xiaomi Mi 9T المتوفرة على ياقوطة من هنا.

وبتمثل جودة FHD دقة ١٩٢٠ × ١٠٨٠ بيكسل ومن هنا حصلت على اسمها التاني 1080p، وتعتبر الجودة دي هي الجودة الأساسية المستخدمة في مختلف أنواع محتوى الفيديو سواء المسجلة أو المباشرة، وعشان كده هي دي الجودة اللي بننصح إنك تتجه ليها لما تيجي تشتري تليفزيون، لابتوب، شاشة كمبيوتر، أو موبايل جديد.

جودة WQHD

تعتبر WQHD اختصار لجملة Quad High Definition وتم استخدام حرف W للتفريق بين جودة QHD وبين جودة qHD اللي اتكلمنا عنها قبل كده، وبتعتمد الشاشات بجودة WQHD على معدل ١٦:٩ المخصص للشاشات العريضة ومن هنا تم استخدام حرف W في تعريف الجودة واللي بيشير لكلمة Wide، وبتمثل جودة WQHD دقة ٢٥٦٠ × ١٤٤٠ بيكسل وده بيخلينا نسميها أحيانًا بجودة 1440p المستخدمة في بعض شاشات الموبايلات الرائدة زي OnePlus 7 Pro باختلاف الدقة لاختلاف المعدل.

شوف عروض أسعار موبايل OnePlus 7 Pro المتوفر على ياقوطة من هنا.

وتعتبر الجودة دي أربع أضعاف جودة HD أو 720p وده بيخليها أفضل من جودة FHD أو 1080p ولكنها أقل من جودة 4K اللي هنتكلم عنها دلوقتي، وعشان كده خلي بالك وماتخلطش بين الشاشات اللي بيتقال على جودة Quad HD وبين الشاشات اللي بيتقال على جودتها 4K Ultra High Definition.

جودة 4K

جودة 4K أو 4K Ultra High Definition أو UHD والل ممكن نقول عليها الجودة الفائقة واللي بتتسمى كمان باسم 2160p لاعتمادها بشكل رئيسي على دقة ٣٨٤٠ × ٢١٦٠ بيكسل بمعدل ١٦:٩ وإن كان فيه مجموعة من الخبراء والمتخصصين بيقولوا أن الدقة دي بالمعدل ده مجرد UHD مش 4K  وبيعتبروا أن جودة 4K الحقيقية هي اللي بتعتمد على معدل ١٧:٩ بدقة ٤٠٩٦ × ٢١٦٠ بيكسل ودي الخصائص المستخدمة في صناعة الأفلام والسينما.

وتعتبر جودة 4K UHD هي الجيل الجديد من شاشات التليفزيون عالية الجودة وبقت منتشرة بشكل كبير في التليفزيونات الرائدة، وكمان فيه محتوى كتير حاليًا بيدعمها بس لسا مش بنفس القدر المتوفرة بجودة 1080p اللي زي ما قلنا بتعتبر الأوسع حاليًا من حيث الانتشار.

تليفزيونات كتير دلوقتي بتدعم جودة 4K أغلبها سمارت وبتنتمي التليفزيونات دي للفئة الرائدة زي تليفزيون Tornado 4K بقطر ٤٣ بوصة الذكي

شوف عروض أسعار تليفزوينات تورنيدو المتوفرة على ياقوطة من هنا.

وزي كمان تليفزيون LG Smart 4K UHD بقطر ٥٥ بوصة

شوف عروض أسعار تليفزيونات LG المتوفرة على ياقوطة من هنا.

جودة 8K

هي الجودة الأعلى حاليًا واللي بتعتمد على دقة تبلغ ٧٦٨٠ × ٤٣٢٠ بيكسل، وبتُعرف كمان بأسماء تانية هي 4320p و8K UHD اللي بيخليها جزء من مجمل جودة UHD اللي بتتكون من UHD و4K UHD و8K UHD، وبتتفوق الجودة دي على جودة 4K بتضمنها لضعف البيكسلات الأفقية والرأسية وده بيخليها تتضمن أربع أضعاف مجمل البيكسلات في جودة 4K و١٦ ضعف مجمل البيكسلات في جودة FHD، ولحد دلوقتي تعتبر الجودة دي مستخدمة بشكل محدود جدًا سواء على مستوى المنتجات الاستهلاكية أو على مستوى المحتوى اللي لسه في مرحلة التطوير.

بكده تكون عرفت إيه الفرق بين أنواع الجودة المختلفة المتوفرة في مختلف الأجهزة الاستهلاكية المعتمدة على الشاشات سواء كانت التليفزيونات أو اللابتوبات أو الموبايلات أو شاشات الكمبيوتر، وكده تكون فهمت إزاي هتقدر تختار جهاز الجاي بناء على المعلومات اللي عرفتها والفروق اللي هتقدر تفرق ما بينها.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.