Reviews of Philips Electric Blender 350 Watt Jug 1 Litre with Juicer & Ice Crushing HR1847/05

• 

  سارة عمار

  (6 years, 11 months ago)

  الخلاط عبارة عن 4×1 مطحنة وكبة وعصارة وخلاط و الموتور 350 وات، ياباني سعة شفشق الخلاط 1 لتر الجميل فيه ميزة جرش الثلج عشان اعمل احلى سموثي و بيتكون من 4 قطع متنوعين (خلاط-عصارة-مطحنة-كبة) قاعدة الموتور تتنظف بسهولة، وبقية القطع تتغسل عادي أو ممكن نحطها في غسالة الأطباق لكل قطعة لوك (قفل) وده لزيادة الأمان الوحش في الخلاط انه من البلاستيك، مع تكرار وضع السوائل السخنة فيه ممكن يتشقق. الموتور بتاعه بيسخن، لازم مانشغلهوش بشكل متواصل. فيه سرعتين سرعة عالية و منخفضة، ومفهوش سرعة متوسطة مثلًا لبشر البطاطس، أو أعلى من الفرم اللي هيا درجة تطلع اللحمة ناعمة جدًا. قاعدة الخلاط ستانليس وعاء الخلاط نفسه بلاستيك خفيف، وبرضه الأجزاء اللي فوق من بلاستيك شفاف. غطا الخلاط فيه قطعة بتتشال عشان تزودي حاجة أثناء عملية الخلط. في مصفاة متركبة في العصارة والخلاط. على الخلاط مرسوم مؤشر للوزن ربع لتر ونص لتر لحد اللتر ده بالمليمتر، وكمان موجود مؤشر تاني ده بقى بعدد الكبايات نص كباية وكباية، وده عشان نقدر نظبط المقادير، من غير ما ترجع تشتري ميزان مخصوص، أو تتلخبط في العدد الخارجي. فيه وعاء داخلي جوا الخلاط في آخره صفاية، ده جزء اضافي عملي لكنها صعبة التنظيف، ومع تكرار الاستخدام الشبك بيفضل فيه بقايا الطعام وبتعمل رائحة مش حلوة، ملهاش لازمة و تقدري تصفي اللي عايزاه دون تقيد. الأربع قطع كانت بتمثل ليا انجاز وسرعة، بدل ما اشتري أربع أجهزة منفصلة عن بعضها، وده كان حياخد حيز في المكان وتكلفة إضافية. تقييمي للخلاط ممكن اقوله في نقط سريعة: السرعة الأولى مش بتأدي مهمتها المطلوبة وبتضطري تشغلي السرعة الثانية عشان العصر والطحن يبقى للدرجة المطلوبة من السماكة أو الطحن. مفتاح التشغيل بيتحرك مع عقارب الساعة للسرعة رقم 2 وعكس العقارب للسرعة رقم 1، وكل واحدة ليها استخدمات، وده بيخليني اتلخبط واشغل سرعة عكس اللي محتاجها وممكن ألاقي نتيجة طحن أو فرم غير اللي محتاجها. الثلج بينزل معاه نقط مايه وده من حرارة الجرش، بعكس ميكسرات تانية مزودة بدرجة تبريد تنزل الثلج مش دايب. الكبة والمطحنة حلوين وبينعموا أي حاجة حابة افرمها أو اطحنها، بس الوعاء مش عملي أبدًا وممكن يوقع منه الفلفل أو الجمبري بعد ما اطحن أو افرم عشان الكمية حتزيد. بالنسبة لخدمات ما بعد البيع فأي قطعة باظت قدرت اغيرها، المشكلة اللي واجهتني أنهم فرضوا عليا لازم اشتري القطعة كلها مش الجزء فقط اللي باظ وده تكلفة إضافية عليا. قطع الغيار متاحة بس تكلفتها عشان أصلي غالية، ممكن عشان استبدل قطعة أشتري جهاز جديد أحسن وأوفرلي. الصيانة والتوكيل تبع العربي جروب، وبيقدم ضمان سنتين، هما كاتبين في البنود أنه شامل كل العيوب، بس ده مش معناه أنه بيصلح أي عطل على حسابه، زي مثال لو سكينة الكبة اتقطمت، حيقول سوء استخدام مني، وده عيب أغلب الضمان ماعندهمش ثقة في المستهلك، ومش بيتم أخذ أي إجراء حتى بعد ظهور عدة شكاوي اتكرر فيها نفس العيب.