أي شوب

آي شوب من الموزعين الرسميين لآبل في مصر. موقع آي شوب منظم جدًا ومتقسم: ماك، أي باد، آي فون، تلفزيون آبل والاكسسوارات. وكل قسم من دول جواه أقسام تانية زي مثلًا قسم الاكسسوارات المتقسم لإكسسوارات الشواحن والسماعات ولوح المفاتيح وغيرها من اكسسوارات الكمبيوتر والموبايل. المنتجات الموجودة على الموقع ليها صور ومكتوب جنبها سعرها بالجنيه المصري ووصف تفصيلي ليها. وكمان فيه تقييمات للمنتجات من مستخدمين آخرين وأسئلة عن المنتج. تقدر تشتري من خلال التليفون أو من على الانترنت أو إنك تزور فروعهم في الزمالك والمعادي. لو مش راضي عن المنتجات تقدر ترجعها أو تبدلها في خلال 14 يوم من تاريخ الشراء ولازم يكون الطلب في حالته الأصلية بدون فتح أو استخدام ولازم تقدم نسخة من الفاتورة الأصلية لكن مصاريف الاسترجاع أو الاستبدال بتكون على حساب الزبون. التوصيل بيستغرق حوالي 5 أيام عمل ولو كان الدافع من خلال بطاقة إئتمان يبقى لازم حامل البطاقة هو اللي يستلم الطلب بنفسه وده طبعا بغرض الحماية والتأمين. كمان تقدر من خلال الموقع إنك تتبع الطلب بتاعك وتعرف وصل لحد فين. الموقع كمان عليه قائمة الأماني ودي قائمة بتضيف فيها كل المنتجات اللي نفسك تشتريها عشان صحابك يشوفوها ويهادوك بيها. آي شوب كمان ليهم صفحات على فيسبوك وتويتر وتقدر كمان تشترك في النشرة البريدية عشان تعرف آخر أخبارهم.