جورميه مصر

بدأوا سنة 2006 وهما مجموعة من الناس اللي حقيقي بتحب الأكل وتقدر الأكلة الحلوة وعشان كدة قرروا إنهم يوفروا في السوق المصري المكونات العالية الجودة للوصول للطبخة المثالية. جورميه ليهم لحد دلوقتي خمس محلات في القاهرة ومحل في الساحل الشمالي بيفتح بشكل موسمي. أقسام المحل كالتالي: الجزارة، منتجات الألبان، المأكولات البحرية، البيت والحديقة وده خاص بالأجهزة والأدوات اللي هتساعد في تجهيز الأكلة الحلوة، المنتجات الطازجة، وصل حديثًا، الصحة، الأمن الغذائي وأخيرًا المطبخ العالمي. عشان تتسوق مع جورميه تقدر توصلهم في أي فرع من فروعهم أو ببساطة تتسوق أونلاين أو من خلال تطبيق المحمول الخاص بيهم. على الموقع جورميه بيطمن الزباين إن الأكل بيتم توصليه في درجة حرارة ثابتة طول رحلة التوصيل وده عشان يفضل في حالة طازجة وصحية طول الوقت ولحد ما يوصل لك. أما عن وقت التوصيل فالموضوع بيختلف على حسب العنوان وكمان بيوصلوا بره القاهرة، للإسكندرية والغردقة والجونة وطبعًا مدة التوصيل ممكن تطول لو كان الطلب خلال يوم أجازة. وطرق الدفع بتكون كاش عند التوصيل أو كمان الدفع بالفيزا أو الماستر كارد عند التوصيل برده. وعشان منتجات جورميه طازة دايمًا بيكون صعب أوي إنك ترجع المنتج بعد طلبه. على موقع جورميه جدول بيشرح لك وقت التوصيل على حسب المكان سواء جوا القاهرة أو بره القاهرة وكمان تكاليف التوصيل اللي بتختلف على حسب المكان طبعًا. المنتجات على الموقع معروضة بشكل جذاب جدًا ومجرد ما تدخل الموقع هتحس تمام كأنك دخلت فرع من فروع جورميه وأول حاجة هتشوفها على الموقع هي المنتجات اللي بتكون عليها تخفيضات. الموقع كمان بيساعدك تعرف وصفات أكل جديدة وصحية باستخدام منتجات جورميه. ولما تتسوق على الموقع كل منتج هيظهر معاه منتجات تانية مقترحة وكله في سبيل الطبخة الحلوة. ومتنساش عشان تتابع آخر عروض وأخبار ومنتجات جورميه الجديدة تقدر تتابعهم على فيسبوك وتويتر وانستجرام أوتشترك في النشرة البريدية.