مميزات وعيوب بوتجاز يونيفرسال ايرون كوك 5 شعلة ستانليس ستيل - فضي - بوتاجازات - اجهزة منزلية كبيرة

• 

  إيمان عادل

  (6 سنة, 5 أشهر ago)

  بوتاجاز يونفرسال ايرون كوك الاستانلس 5 شعله شكله انسيابي ومتوفر بلون فضي جميل، مزود بخاصية أمان، يعني لو حاجة وقعت على البوتجاز وهو شغال الغاز هيفصل لوحده، وده أمان لست البيت وللعيلة كمان خصوصاً الأطفال. تشغيل كذا عين في نفس الوقت بيخلي زراير البوتاجاز تسخن جامد، البوتاجاز مزود بحوامل زهر تقدر تشيل كل احجام واوزان الحلل سواء كانت حلل استانلس استيل ولا سيراميك ولا الومنيوم لكن حوامل الأواني الزهر صعبة في التنضيف أوي. فرن البوتاجاز له مروحة فايدتها إنها بتساعد علي توزيع الهواء جوه الفرن عشان الأكل يستوي صح من كل الجوانب. الاشعال الذاتي في البوتاجاز بيبوظ بسرعة وترقيم درجات الحرارة اللي مكتوب جنب المفاتيح بيختفي مع الوقت. هو سهل التنضيف، يعني بقطعة قماش مع شوية سايل تنظيف هيكون بيلمع وبيبرق من النضافة، مش بيحتاج أي مذيب للدهون ولا منظفات سعرها غالي ولا بيسبب مضايقة من ريحة الكيماويات اللي ممكن تسبب ضرر، غطاء البوتاجاز مصنوع من الزجاج الكريستال، يعني صعب يتكسر وكمان بيدي شكل حلو في المطبخ. ومقبض الفرن مصنوع من الاستانلس، يعني يتحمل مع فتح وقفل باب الفرن المتكرر مع كل طبخة التحكم في ارتفاع البوتاجاز بيتم بسهولة عن طريق لف رجلين البوتاجاز الأربعة لحد ما يتظبط مستواه زي ما الواحد عاوز، مزود بسبع مفاتيح منهم خمس مفاتيح لشعلات البوتوجاز، ومفتاحين للفرن والشواية، وطبعا دي ميزة مش موجودة في كتير من البوتاجازات، والميزة هنا إمكانية تسوية الأكل وتحميره في نفس الوقت وده طبعا بيوفر وقت وجهد. من العيوب الي تبع البوتاجاز عدم رد خدمة العملاء الخاصة بيونيفرسال على التليفونات إلا نادرًا أوي ، البوتاجاز بيجي خامة استانلس ومقاس 60*90، قطع غيار البوتاجاز متوافر في كل التوكيلات وسعرها متوسط مش غالي أوى، ضمان البوتاجاز ده بيكون 5 سنين.