مميزات وعيوب Netlon طقم حلل جرانيت تركى - 10 قطع

• 

  سارة عمار

  (6 سنة, 5 أشهر ago)

  الأكل مش بيلزق فيها وده خلاني وأنا بشوح فيها البصل تكون السمنة ربع معلقة، يعني أكل صحي ومتسبك صح من غير أي كولويسترول يضرني، وبرضه ده مع الرز واللحمة وكله. الطاسة والصينية ملهاش غطا والأحسن والجديد أنه يبقى ليهم غطيان عشان لو حنعمل فيهم بيتزا الطاسة تسيح الجبنة والعجين يستوي مظبوط. المقاس حلو أوي في منها الحلل الصغيرة اللي بعمل فيها رز أو أسلق بطاطس وفي المقاس اللي في النص بحط فيه صلصة الباشميل والمكرونة، وفيه الأحجام بقى الكبيرة بتاعت سلق الفراخ والبط وعشان أقدر أقلبهم مستريح، ومش كل مقاسات الحلل تبقى مظبوطة مع كل البوتاجازات، فدي مناسبة للبوتاجازات الكبيرة والصغيرة. عشان أكون جبتلكم من الآخر في قصة سامة وأبخرة والكلام الكبير ده، أنا بقولكم لو اتخدشت أو اتجرحت بمعلقة والطبقة اللي فوق دي قشرت يبقى تترمى، هي طبعًا عشان تقشر ده صعب أوي، بس بقولكم لو حصل كده ارموها لأن الطبقة اللي مغطياها واللي بتخلي الأكل مايلزقش حتكون مع التسخين اللي بعد كده أو لو جرحتوها بمعلقة حتطلع غاز الدارون اللي جي من مادة اسمها الراديوم وخالي بالكم ده غاز مشع يعني بيأثر على صحتنا وجسمنا. الأكل بيطلع طعمه حلو وريحته حلوة مش متغير زي مثلًا زي الحلل التافلون بحسها بتغير ريحة الأكل وخاصة لو حلويات ومخبوزات في الصينية. الحلة تقيلة والإيدين ضعيفة انها تشيل التقل ده عشان كده دايمًا بشيل الحلة كلها وبخاف اشيلها من الإيدين. بتخلص وبتنجز وقت الطبخة في وقت قصير عشان الحلة أو الطاسة بيمتصوا الحرارة أكتر من أي حلة تانيه بيسخنوا ويفضلوا سخنين، أكيد مش زي وقت نفس الطبخة في الحلة البريستو ولا هوا نفس الوقت بتاع الحلة الاستانلس مثلًا، فعشان كده هيا في النص. القشرة اللي برا باللون اللي عليها ده بعد فترة من الغسيل الكتير أو لو بتستخدمي مسحوق البطاس فيه زيادة يبقى حتلاقي اللون اتغير. الحلل مش من النوع اللي يدخل الفرن وأنا في أكلات زي كباب الحلة بحتاج أديله تحميره في الفرن، في حلل ينفع تدخل الفرن النوع ده مش منهم. ايدين الحلل والطاسة بيسخنوا أوي، لازم تكوني لابسة جوانتي أو عندك مساكات ومفهاش عوازل. الطقم لونه بني بعدد 4 حلل وطاسة وصينية و4 غطاء والطقم مصنوع من الزجاج، الحلل دي لسه ماوصلتش للحلل مثلًا الألماني اللي بيكون ليها ضمان وتوكيل واستبدال والكلام الكبير ده، دي منتج تجاري كده بيخدم المستهلك المتوسط الدخل.