نصائح لشراء كاميرا للمستخدم العادي

أنسب-أنواع-الكاميرات-للمستخدم-العاديكتب: أيمن ربيع

لو قررت تشتري كاميرا ومحتار بين الأنواع والموديلات الكثيرة جداً في السوق، هنتكلم في المقال ده عن أهم المواصفات اللي بيحتاجها المستخدم العادي في الكاميرا، وأنسب أنواع الكاميرات للمستخدم العادي، وازاي يقارن بين الكاميرات ويختار الكاميرا اللي تناسبه.

أول حاجة لازم تعرفها قبل ما تبدأ في الاختيار بين الكاميرات، إن الشركات اللي بتصنع الكاميرات درست السوق كويس وعرفت إن اللي بيشتروا الكاميرات 3 فئات  حسب استخداماتهم (مستخدم عادي، مستخدم هاوي، مستخدم محترف) وصممت لكل مستخدم منهم كاميرا بخصائص ومواصفات تناسب استخداماته.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

أنسب أنواع الكاميرات للمستخدم العادي

المستخدم العادي هو اللي بيشتري الكاميرا عشان يصور بيها أحداث عادية، ويوثق بيها ذكرياته مع الأسرة أو العائلة أو أصحابه في المناسبات المختلفة، وده مستخدم مش محتاج غير كاميرا بسيطة وسهلة في الاستخدام بدون خصائص ومواصفات معقدة.

أنسب  كاميرا تناسب المستخدم العادي هي فئة من الكاميرات اسمها صوب وصور  Point & shoot Cameras  أو الكاميرات المدمجة Compact Cameras .

الكاميرات المدمجة

  • هي كاميرات صغيرة في الحجم بخصائص معقولة لكن تعتبر ممتازة جداً للمستخدم العادي.
  • الكاميرات المدمجة فيها تفاوت كبير جدًا في الإمكانيات والمواصفات حسب احتياج المشتري ، وكل ما تزيد المواصفات بتزيد الأسعار طبعاً لكن في النهاية بتكون في حدود معقولة يقدر يشتريها أي مستخدم عادي .

قبل ما تشتري كاميرا

  • لازم تعرف إن مفيش كاميرا مدمجة فيها كل حاجة، أي كاميرا مدمجة بتكون فيها مواصفات عالية على حساب مواصفات تانية عادية.
  • لازم تفكر كويس أنت هتستخدم الكاميرا في ايه؟ وعلى أساس استخدامك هتقدر تحدد أهم المواصفات اللي أنت محتاجها في الكاميرا وتقدر تختار الكاميرا المناسبة ليك .

المواصفات اللي بتفرق بين الكاميرات كثيرة جداً ومحتاجة لشخص خبير عشان يقدر يقارن بين الكاميرات على أساس أدق التفاصيل لكن بالنسبة للمستخدم العادي مش بيفرق معاه غير مجموعة معينة من أهم المواصفات.

أهم مواصفات الكاميرات المدمجة

1. الأيزو (ISO)

Nikon-Coolpix-S2900

 

  • يعبر رقم الأيزو عن حساسية المستشعر للضوء (المستشعر زي الفيلم في الكاميرات العادية).
  • كل ما زاد رقم الأيزو بتزيد كفاءة الكاميرا في التصوير في الإضاءة المنخفضة، وطبعاً يُفضل تشتري كاميرا فيها أيزو عالي لو كنت هتستخدم الكاميرا في تصوير مناسبات ليلية زي الاحتفالات، والأفراح أو في أماكن مغلقة بعيدة عن إضاءة النهار؛ لأن الأيزو العالي هيخلي إضاءة الصورة ممتازة وثابتة بدون ما تحتاج لفلاش أو حامل كاميرا.
  • بعض الكاميرات الـ Compact بيكون فيها مستشعر بأيزو 3200 بيطلع صور ممتازة في الإضاءة المنخفضة جداً زي كاميرا Canon PowerShot Ixus 265 HS أو Samsung WB35F.
  • لكن أغلب الكاميرات المدمجة بيكون أقصى أيزو فيها  1600  وهو معقول في التصوير في الإضاءة المنخفضة زي كاميرا Canon PowerShot A3400 IS أو كاميرا Nikon Coolpix S2900.
  • ننصحك متشتريش كاميرا بأيزو أقل من 1600 .

2. الزووم البصري

Canon-PowerShot-SX610

  • الزووم البصري هو قدرة العدسة على التقريب ويعبر عنه بالقيمة X.
  • يعني لما تلاقي أن زووم الكاميرا 4X معناها أن العدسة تقدر تقرب المشهد 4 أضعاف المسافة، بصيغة أكثر توضيحًا نقدر نقول أن الجسم اللي على مسافة 4 متر يظهر كأنه على بُعد متر واحد من الكاميرا.
  • غالباً الكاميرات الـ Compact بيكون أقصى زووم فيها هو 5X .
  • لكن بعض الكاميرات بيوصل الزوم فيها لـ 21X  زي Samsung WB350F .. أو 18X  زي Canon PowerShot  SX610 HS.

الفرق بين الزووم البصري والزووم الديجيتال

  • الزووم البصري تكبير للصورة عن طريق تغيير الطول البؤري للعدسة.
  • الزووم الديجيتال هو تكبير الصورة عن طريق تكبير البكسلات، يعنى كأنك بتكبر الصورة على أي برنامج تعديل زي الفوتوشوب.
  • أغلب الكاميرات بيكون فيها زووم ديجيتال 4X ومعناه أن الكاميرا بتكبر البكسل 4 أضعاف حجمه الطبيعي.
  • لكن لا يُفضل استخدام الزووم الديجيتال لأن نتيجته مش بتكون كويسة في الصورة (بتكون الصورة مبكسلة) والأفضل أنك تمنع الكاميرا من استخدامه في الإعدادات الخاصة بالزووم.

3. الفلاش

Canon-PowerShot-Ixus-265-HS

  • يختلف الفلاش حسب قوته من كاميرا لأخرى، لو دققت في مواصفات الكاميرا هتلاقي مكتوب فيها مدى إضاءة الفلاش ( يعني بيعمل إضاءة كام متر أمام الكاميرا بحيث تكون كافية لالتقاط الصورة).
  • لو كنت هتستخدم الكاميرا في تصوير مشاهد ليلية كثيرة فلازم تهتم بمواصفات الفلاش، وتتأكد أن قوة فلاش الكاميرا ومداه في الإضاءة مناسب ليك.
  • أغلب الكاميرات الـ Compact بيكون أقصى مدى لفلاشها 2-3 متر، لكن بعض الكاميرات بيوصل مدى الفلاش فيها لـ  4 متر زي  Canon PowerShot Ixus 265 HS أو 4.8 متر زي Sony Cyber-shot DSC-W380 .

4. تصوير الفيديو

Samsung-WB350F

  • إذا كانت كفاءة تصوير الفيديو مهمة بالنسبه لك لازم تتأكد من حاجتين: خاصية تثبيت الصورة، وأعلى دقة لتصوير الفيديو.
  • خاصية تثبيت الصورة Image Stabilization  : هي اللي بتقلل من اهتزاز الصورة بسبب اهتزاز الكاميرا في اليد أو أثناء الحركة، وهي خاصية موجودة في أغلب الكاميرات حالياً.
  • أعلى دقة لتصوير الفيديو في الكاميرا: بعض الكاميرات بتصور HD 720 وبعض الكاميرات بتصور Full HD 1080 ، لكن متخليش الدقة تخدعك لأن في رقم تاني مهم جداً وبيأثر على كفاءة الفيديو وهو عدد الإطارات في الثانية الواحدة  Frame Per Second – fps، وغالباً بيتراوح من 25fps  إلى 60fps.
  • كل ما كانت دقة الفيديو أعلى مع عدد fps أعلى كانت كفاءة الفيديو أفضل.

من الكاميرات الـمدمجة اللي بتجمع بين دقة فيديو Full HD و 60fps هي كاميرا Sony Cyber-shot DSC-WX350، وكاميرا Sony Cyber-shot DSC-WX80، وكاميرا Canon PowerShot SX710.

من الكاميرات الـ Compact  اللي بتجمع بين دقة Full HD  و 30fps  هي كاميرا Canon PowerShot SX610 ، و كاميرا Samsung WB350F.

5. الميجا بكسل

  • أكثر حاجة تعرفها الناس في مواصفات الكاميرا هي الميجا بكسل.
  • في الحقيقة عدد الميجا بكسل كان مهم زمان لما كانت تكنولوجيا الكاميرات الديجيتال في بدايتها، وقتها كانت الكاميرا 4 ميجابكسل أفضل بكثير جدًا من الكاميرا 2 ميجابكسل .

لكن حالياً مع تطور تكنولوجيا الكاميرات الديجيتال مفيش فرق كبير بين الكاميرا 10 ميجابكسل وأي رقم أعلى من كده، وعلى عكس المتوقع ممكن تكون صورة الكاميرا الأقل في الميجابكسل أفضل من الكاميرا الأعلى لأسباب تقنية يطول شرحها.

لو كنت عايز تعرف ليه ممكن تقرأ المقال دا عن خدعة عدد الميجابكسل.

الكاميرا السعر يبدأ من
Samsung WB35F 1,120 ج.م.
Canon PowerShot  SX610 HS 1,949 ج.م.
Canon PowerShot Ixus 265 HS 1,099 ج.م.
Nikon Coolpix S2900 828 ج.م.
Samsung WB350F 1,900 ج.م.
Sony Cyber-shot DSC-W380 2,109 ج.م.
Nikon Coolpix P530 3,099 ج.م.
Canon PowerShot SX60 HS 5,299 ج.م.
Canon PowerShot A3400 IS 899 ج.م.
Nikon COOLPIX L340 1,800 ج.م.

التعريف بالكاتب

أيمن ربيع : مصور هاوي ومهتم بدراسة الكاميرات وتقنيات التصوير، انشأت موقع (اشتري كاميرا) لمساعدة هواة التصوير بنصائح ومعلومات عن الكاميرات وأساسيات التصوير، وكذلك لتبادل إعلانات بيع وشراء الكاميرات المستعملة من خلال الموقع.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.

3 thoughts on “نصائح لشراء كاميرا للمستخدم العادي”

  1. Ashraf Abdel Aziz says:

    Thank you

  2. سلمى says:

    انا معاية نيكون 3200 عوزة اعرف نوع اللينس والفلاش اللى اجبهملها عشان تتبقى احسن من كده

    1. Michel Ramsis says:

      موضوع اللينس و الفلاش ده يا سلمى بيحدده حاجات كتير..
      بتصوري indoor ولا outdoor و كمان بتحتاجي لينس zoom ولا wide و كمان الـbudget اللي معاكي 🙂
      ممكن تقوليلنا هتحتاجي ايه من الكلام ده و ميزانيتك و احنا نساعدك 🙂

Leave a Reply

Your email address will not be published. Required fields are marked *